【唐奕聰猝逝】樂隊Mr.成員感謝恩師 MJ：佢教樂隊應有樂隊模樣

2021-03-03 10:30

樂隊Mr.與Gary Tong（唐奕聰）合作無間，視Gary為老師的吉他手MJ（譚傑明）在社交網貼上對方在錄音室休息的黑白照，寫上長文：「可能我呢世都唔會接受到，呢位我覺得係整個音樂界最好嘅人，今日離開左（咗）我地（哋）。如果當初無Gary，Mr.樂隊嘅音樂唔會取得我地（哋）曾經有嘅成就，我地（哋）嘅音色唔會係咁，一直都係佢同我講：樂隊應該要有樂隊嘅模樣。亦都係佢教我，一首歌入面點樣拿捏平衡主流同另類，令我對打後嘅製作獲益不淺。好多佢曾經同我講嘅野（嘢），當時我新，好多都無聽，到我而家大左（咗），比（畀）意見後浪時，原來我講得最多嘅，就係當時Gary教我嘅野（嘢）。Gary哦，我真係無同你講過，喺我心入面我一直當你係我老師，好多謝你，多謝你為我地（哋），為我做過嘅一切，你永遠永遠都會喺我嘅心入面。老師，一路好走」Mr.另一成員Ronny（黎澤恩）亦貼上多張與Gary演出的合照，留言：「You rocked my world master Gary. 我們遲下再jam歌吧，我仲未聽過你彈結他...We will meet again, in the world of music」