黃凱芹 X 杜自持音樂會｜黃凱芹太長氣致超時完show 周慧敏驚喜現身撐老友 杜自持樂壇裡只服兩名歌手？
2025-01-03 14:15 
《唱•2025 Live》黃凱芹 X 杜自持音樂會一連四場於西九文化區戲曲中心大劇院舉行，昨晚（2日）進行首場演出，一班圈中好友劉德華、鄭丹瑞、周慧敏等送上花籃祝賀。
黃凱芹、杜自持道出相識經過
黃凱芹笑言第一次找杜自持編曲，「原本不認識對方，只睇個名以為唐人」，笑指對方多樓多物業，「都是自持」，當時邀請杜自持為蔡國權作曲的《再戀》編曲，同時大讚對方的編曲功力，令該歌曲直至現在也沒有違和感，並不會覺得過時。杜自持稱自己是顧嘉煇第三代傳人，自小認識對方，當年有自薦幫煇哥手，對方叫他每日早上10時到其家中，之後跟隨煇哥出入錄音室，能夠讓唱片公司人員認識他。
杜自持爆劉德華大鑊？
黃凱芹透露Live Band其中一位結他手是杜自持的兒子Brian，杜自持笑言自己不懂彈結他，但有一日兒子嚷著他買枝結他，原來兒子在網上平台自學結他，杜自持覺得兒子有潛質，便送他到美國讀音樂兩年；Brian則大爆爸爸在Band房鬧人十分凶狠，黃凱芹即叫他不要再爆料，場面搞笑。當黃凱芹獻唱《假裝》後，發現原唱者周慧敏亦有入場欣賞睇騷，便說：「你又話同隻貓睇病嘅？原來改咗期，但知你嚟特別緊張，亦多謝你嚟，祝你隻貓早日康復。」而Hi-Fi天后陳潔麗當晚擔任嘉賓，並唱出杜自持監製作品《小玩意》，杜自持亦為她伴奏手風琴。杜自持曾跟劉德華（華仔）合作開公司兼擔任音樂監製，當晚黃凱芹亦獻唱劉德華多首歌曲，更大爆當年錄製《一起走過的日子》時，華仔拍完戲再趕返錄音室錄歌，因為那首歌急於推出。
《唱•2025 Live》黃凱芹 X 杜自持音樂會原定晚上10時50分完騷，最後超時半小時多。尾聲時歌迷大叫Encore，黃凱芹、杜自持亦再度出場滿足歌迷，黃凱芹最後唱出《再遇》為音樂會作完美落幕。
相關文章︰黃凱芹為《中年3》任評審否認頂替伍仲衡 大讚參賽者水準高 杜自持邀周慧敏來睇騷
黃凱芹太長氣致演唱會超時？
黃凱芹和杜自持完騷接受訪問，談到超時，黃凱芹坦言第一場演出，時間安排上差少許，因為他有好多說話要講，之後的演出「可能分享部份會删減少少」，但歌曲不會減少。他說：「我哋未試過咁嘅形式，唱吓又彈吓又講嘢，跟以往演唱有啲唔同，所以新嘗試係有啲『蝦碌』嘅。（超時罰錢？）只要晚上12點前搞掂就唔使。」杜自持承認親自邀請周慧敏睇騷，原本對方指愛貓病了不能到場，後來改期睇醫生又有人照顧貓貓，才能夠到場欣賞。問到可覺驚喜？黃凱芹說：「佢本來話嚟唔到，佢愛貓如命，而貓貓年紀都幾大，佢愛貓多過愛我哋，冇預佢會嚟，好驚喜，都開心呀！」
黃凱芹唱慧敏歌曲《假裝》感壓力？
對於獻唱周慧敏歌曲《假裝》可會感壓力？黃凱芹笑言沒有壓力，反而壓力緣自杜自持，因為平時開騷是把自己的歌曲排滿，甚少唱別人的歌，今次演唱別人的歌，是重新學習，加上杜自持是大師級，在他身旁感到壓力。黃凱芹說：「呢個騷好急促，11月22日第一次視像會議傾用乜形式合作，短短咁快編好咁多歌，我都不能怠慢，落實歌單後，我就日以繼夜聽佢啲歌。」談到兒子Brain大爆父親很嚴厲，杜自持解釋自己對事不對人，如果他經常彈錯，「當然要出聲」，否則不會有進步。黃凱芹笑指對家人是會特別嚴厲的，又搞笑指杜自持對有份演奏的外籍女結他手卻好溫柔，「未有鬧過」，杜自持即說：「我有鬧佢架！你冇睇到。」談到可有鬧過黃凱芹，杜自持坦言沒有，他從來不會鬧藝人，又指樂壇裡，令他感動的歌手只有張學友和黃凱芹，他說︰「黃凱芹係非常之有技巧嘅歌手，真係識得唱歌嘅歌手。」問到聽完杜自持讚自己時的感受，黃凱芹笑說：「我可以退休啦！死而無憾。」
最新回應