【健康Talk】冬至系列（三）：溫度時間有講究 湯圓都要聰明食

一家人一齊食碗湯圓，象徵一年都團團圓圓，可謂冬至必不可少。但其實食湯圓都有不少注意事項，不想一家團聚的開心時刻搞到胃痛又肚屙，可勿小看一碗湯圓啦。

溫度：不宜食凍湯圓
湯圓起鍋固然熱辣辣難入口，但攤到凍同樣不是好方法。湯圓粘性高，加上內裏多有餡料，放涼後食難咀嚼難消化。加上湯圓本身已是由難以消化的糯米製成，所以趁溫熱可入口時就要食啦。

時間：早晚都不宜食
糯米質地煙韌，胃部需要較長時間消化，早上腸胃功能較弱，作為早餐對胃部就過於有負擔，可能會影響午餐食欲。而同樣道理，如果太夜食湯圓，亦容易導致睡前消化不良，尤其做宵夜更容易長胖。

分量：正餐4、5粒已足夠
無餡的小湯圓，10顆熱量就有70千卡，等於1/4碗的白米飯，而有餡的甜湯圓，以黑芝麻湯圓為例，4顆熱量就抵得上1碗白飯。常見的湯圓每粒約20克，如果當正餐食，就4、5粒左右就足夠，如果當甜品食就應該再減少，2、3粒就足夠。

另外要注意，以下幾類人士不適宜食湯圓：
1.糖尿病：因為糯米的升糖指數高，食用後易令血糖快速上升，甜湯圓更要忌口，鹹湯圓亦要酌量。

2.高血壓、腎臟病：包餡鹹湯圓鈉含量較高，建議避免鹹湯圓，甜湯圓亦要適量，若吃鹹湯圓更應避免喝湯。

3.消化不良、胃食道逆流：糯米不易消化，加上甜食易致胃食道逆流，建議腸胃不佳者酌量食用，並要細嚼慢嚥。