古天后日誌｜港股乏成交配合難破悶局

8月31日，天氣炎熱，部份時間有陽光，亦有幾陣驟雨及雷暴。隔晚美股高開低走，美股連續第三日下跌，早段開以略為彈一彈即散，道指早段升逾百點後，收市跌308點；標指跟納指分別跌44點及134點，跌幅超過1%。近兩個星期美股開始熱炒三四線股仔，甚至係缺乏基本因素支持嘅Meme股，重磅股唔行，就算過後拆細必炒嘅靈丹妙藥，喺TSLA拆細後亦失效，見項回落，美股都炒到接近尾聲，小心音樂椅遊戲音樂隨時停。話口未完，美股就連跌三個交易日。睇嚟美股開始進入另一個調整浪，加上9月加息0.75厘嘅預期大增，喺議息前美股睇嚟易跌難升。

至於港股呢邊，噚日恒指喺期貨結算日，又再失守二萬大關，雖然比亞迪(01211)交出一份理想業績，但股價未見有太大反應，只係略為抽高3%就無再follow。而噚日收市後就爆出股神巴菲特早於8月24日已喺市場沽逾百萬股，隔晚股價喺ADR插水，股價較噚日H股收市跌逾4%，今日唔使問都會裂口低開，240元有個支持位，睇下守唔守，失守嘅話，下一個支持位要去到220，都咪話唔大鑊。

港股整體仍未擺脫上落市格局，上周好友一度借中美就中概股達成審計協議發動攻勢，港股由低位19200反彈，至上周五晚夜期更一度挾升至20500水平，不過二萬點喺噚日結算日再度失守。淡友更借隔晚美股繼續走軟，再發力將夜期推低至19400水平，今日港股都係繼續向下炒。恒指短線支持大約係19500點，喺大市仍缺乏成交之下，大戶要舞高弄低指數更從心所欲。暫時恒指或於19200至20200水平呢一千點上落。

古天后

(徐狄怡，證監會持牌人)