古天后日誌｜港股打風前夕偏軟少做少錯

8月24日，初時大致天晴，但有煙霞，局部地區有驟雨及雷暴，日間天氣酷熱。颱風逼近，天氣於晚間稍後時間料轉差。隔晚美股連續第三晚下跌，市場等待Jackson Hole央行會議。美國8月份製造業PMI初值由52.2下跌至51.3的兩年低位，並差過預期51.8。投資者關注顯示美國經濟放緩數據，以及觀望鮑爺喺央行年會放會再放鷹，美股暫時缺乏方向。

留意呢兩日虛擬貨幣走勢轉弱，反映市場risk on情緒收歛；而油價則反彈，小心通脹因為油價未能搵到個頂，咁聯儲局講到明，控制通脹喺首要任務，若然通脹再度走高，屆時聯儲局不得不加大收水力度。

至於港股則跌至19500水平，目前於呢水平爭持，19500水平係5月低位，其後港股喺6月份半年結反彈，可惜至7月無以為繼，嚟到8月更加係水盡鵝飛，成交萎縮下，港股有陰乾之勢，19500實在不容有失。

京東(09618)業績好過預期，雖然內地喺疫情反覆下，再度於各地封城，但集團第2季度營收仍有5.4%增長，non-GAAP盈利更達65億元，增長41%。留意京東喺230元水平阻力唔細，小心今日高開低走。

有機會下試19000關

困擾港股嘅又何止係缺水問題，空軍長期紮行馬沽空，唔少股份嘅沽空比例每日都超過三成，一旦市場嘅買盤縮一縮，被沽空嘅股份好容易喺成交薄弱下，無厘頭急跌。由於空軍長期招呼港股，令到北水都卻步，北水雖然任性，但亦非全部係蠢人資金，既然外資長期玩沽空，北水亦無謂硬碰，選擇離場，寧願留返喺A股搵機會。

颱風馬鞍逼近，有機會喺明日吹到正香港，明日有機會有日打風假期而休市，估計今日市況更趨淡靜，但正因為咁，港股有可能偏軟，一旦19500失守，唔排除有機會下試19000至19200點，尤其喺19000至19400嘅牛證份量相當夠，唔排除呢批牛證有機會陣亡。雖然發行商唔一定要將牛證殺到盡先賺到錢，但當呢批牛證派得七七八八，到價殺埋批證，再發一批新證搵食，再派過出街，發行商要做到貨如輪轉，咁先係長期賺錢嘅方法。

古天后

(徐狄怡，證監會持牌人)