古天后日誌｜中免IPO吸引資金流入 重磅股業績決定資金去留

8月15日，大致天晴，日間天氣酷熱，但局部地區有驟雨，炎熱天氣持續。美股上周五保持升勢，道指升424點；標指升72點；納指再升逾2%，升267點。暫時美股三大指數已升穿下降軌頂部，反彈勢頭不變。上周美國已通過2800億美元晶片及科技去案，周末期指眾議院再通過4300億美元通脹削減法案，市場暫時樂觀情緒仍然高漲，但以目前通脹仍然高企下，市場有否過份樂觀，仍有待確認。

雖然美股全面向好，但五大中企包括中石油、中石化、中人壽、中國鋁業、上石化宣布從ADR退市，拖累中概股走弱。雖然呢幾隻股份一向喺ADR都無乜睇頭，但佢哋宣布退市ADR，對中概股嘅氣氛點都有啲影響。唔排除之後又更多中企從ADR退市。

港股暫時無乜方向

再有美國議會議員到訪台灣，台海局勢維持緊張局面，港股暫時無乜方向，能守喺20000點之上已經係萬幸，今個星期唔少藍籌股公布業績，周五又到恒指服務公司進行季檢，留意可能左右後市走勢。港股一直喺二萬水平徘徊，成交持續萎縮，上周五成交額只有750億元，成交淡靜反映港股仍然未有資金流入，20000水平淡友亦懶得去追沽，因為值博率唔高。再睇埋以目前港股嘅規模，期指成交亦縮減，好明顯連大戶亦無心戀戰，個股自然難炒，就連指數單日波幅亦縮水，期指炒友亦見搵食艱難。

今個星期中免招股，有機會成為本來度最大集資額新股，港元略為轉強，話晒係大型IPO，有返啲錢流入都正常。至於流入參與新股嘅資金，會否喺中免IPO後繼續留喺港股玩落去，今個星期嘅重磅股派成績表，若然能交出理想業績，或有機會令呢筆資金留喺港股玩多陣。相反，重磅股業績強差人意，認購新股資金喺IPO完成後，亦會毫不客氣，頭也不回地流走。

古天后

(徐狄怡，證監會持牌人)