古天后日誌｜港股借消息於20000水平炒上落

8月17日，天氣炎熱，部份時間有陽光，間中有幾陣驟雨。隔晚美股個別發展，零售巨企業績不俗，不過經濟數據參差，三大指數只有納指微跌25點，道指跟標指分別升239點及8點。10年債息變化唔大，一直處於3%以下水平，目前喺2.8%左右，美股持續向好。

不過美股反彈到現水平，已開始見抄底資金開始獲利，呢兩日上升動力已減弱，不過市場已重新相信成長股係可以跑贏傳統價值型股份。都係嗰句，話美股由熊入牛言之尚早，目前都未係可以進取嘅時候，摸石過河，一步一步跟勢行落去，總之有唔對路就要識得跳車。

缸邊友已成驚弓之鳥

噚日午後外電有消息指騰訊(00700)計劃出售手上美團(03690)股份，雖然其後內媒指騰訊未有任何出售美團股份計劃，美團喺ADR有所回升，但噚日股價急跌一成已成事實，反映缸邊友已成驚弓之鳥，稍有風吹草動，唔理三七廿一走咗先。其實狼來了故事都唔係第一次，之前喺6月份，多次有消息傳出阿里(09988)分拆螞蟻上市，阿里股份一度高見120元，其後證實又係流料一單，阿里股價打回原形，更因為軟銀減持，股價更反覆跌至90元水平。不過近日美團屢遭北水減持，單係噚日北水錄淨沽出美團5.7億元，如果今日美團反彈，咁北水噚日沽貨係啱定係錯，都好難定論。

至於一直受債務問題困擾嘅內房股，阿爺再出手，以中債信用作擔保，協助仍有償債能力嘅內房發債，其中龍湖(00960)已成功發行35億無抵押貸款。暫時內房股總算有救，但只限於仍有償債能力嘅內房企業，至於負債比率喺五成或以上嘅，暫時都係危危乎。

港股仍然死死吓，6月嘅反彈，令市場一度以為美股調整，港股回升，東升西降，誰知發展到7月情況剛剛相反。不過噚日騰訊減持美團嘅消息，又未見港股殺到豬頭咁，目前港股仍然係窄幅上落，喺20000水平磨爛席，買賣兩閒，乏善可陳。

古天后

(徐狄怡，證監會持牌人)