古天后日誌｜港股挾淡倉後能否再下一城取決成交額

8月26日，颱風過後，雨過天青，日間部份時間有陽光，間中有幾陣驟雨，日間天氣炎熱。隔晚美股做好，三大指數回升，道指升322點；標指跟納指分別升58點及207點。市場正等待央行年會舉行，作為東道主嘅堪薩斯城聯儲銀行行長喬治率先「放鷹」，直言當前利率水平未足以令經濟降溫，聯邦基金利率可能要升至4厘以上。經濟數據亦支持聯儲局「鷹派」立場。美國公布第二季國內生產總值(GDP)修訂數字，由原來嘅以年率計按季下跌0.7%，上修至下跌0.6%。就業市場表現亦相對地穩健。

美國通脹高企下，經濟表現未至於太差，係聯儲局仍有空間加息壓抑通脹，美股呢一輪反彈係炒Fed Put，即係打賭明年聯儲局好快會減息，但睇返經濟數據同埋美股表現，聯儲局未有耐有減息需要，至於9月議息繼續加息無乜懸念，喺議息之前，美股可能繼續高位徘徊，當下月議息及加大縮表力度，就真係要小心。

美股氣氛仍然向好

雖然目前嘅經濟數據反映美國經濟仲頂得幾吓頭鎚，但實體經濟正轉弱，零售業仍有去庫存問題，晶片業前景亦未如理想，NVDA及AAPL曾希望減少下半年對台積電的訂單被拒，多少反映科技股對需求回落預期。不過目前美股氣氛仍然向好，資金繼續risk on。總之炒美股都係步步為營，踏入9月要加倍小心。

至於港股噚日半日市，竟然錄得900億元成交，挾淡倉意味甚濃，借阿爺放水嘅消息，單日升700點，夜期更進一步，將淡友往死裡打。即管睇睇今日港股成交能否維持高水平，以噚日半日市有八百幾九百億計，今日全日市，若果成交額能維持喺1600億以上，咁呢一輪反彈浪可進一步再向上挑戰20400至20600點，但相反成交又死氣沉沉，只有1000億樓下，噚日挾淡倉可能又告一段落，港股或者喺結算前守喺20000水平之上，要待結算過後先再有方向。

古天后

(徐狄怡，證監會持牌人)