阿碌開咪｜網上有個「大水塘」

今時今日，做傳統電視台真係——大件事！　

睇睇股價，小弟呢類「資深傳媒人」，發夢都未諗過，電視廣播及有線電視兩大電視台會慘成咁，直接感覺就是——該煨！

曾經七十幾元的TVB，如今插到四個幾。有線電視更大鑊，曾經五個幾，如今得返三仙幾（執筆時），簡直難以想像。睇睇兩家公司的PE及息率，也是空白一片。呢個現象，若果新公司，仍可以話係投資期或開始高增長期，但兩家乃老字號，管理層真係日日要抹冷汗，老闆面色會點？

呢邊傳統電視台謝晒，但另一邊的網上世界，則嘭嘭聲到得人驚。

單講講兩周前被捕的一個KOL，若非此案爆出，小弟都唔知，原來「可以咁搵錢」！

簡簡單單似江湖賣藝，在網上揚言傳授「溝女術」，保證成功，咁即有N咁多人願畀七萬幾元一年學野。一個七萬幾元，十個七十幾萬元，若有一百個就七百幾萬元，丁KOL可能根本冇報稅！

哈，真係咁筍？引起我好奇，立即訪問幾位「網上商業」專家，點解咁勁！

「碌Sir，簡單，好多野網上做得，傳統電視台唔做得，勿講話粗口、三級、四級內容，單單講『教人絕技』，個水塘已大到你唔信！」

專家B指出，一般人有不少私隱難於啟齒的期望，簡單的例如醫禿頭、減肚腩、豐胸……進一級的例如壯陽、增加持久力、溝女（或仔）……都大把人肯付出重金去學。

引呢類人入局手法，乃首先在網上賣廣告，話有免費訓練課程，為你度身訂造，歡迎試學。

人人皆有貪念，一聽見可以生髮、減肥、發達、變靚……又課程免費，當然仆去上。

唔怕你精，唔怕你呆，最怕你唔來。只要KOL說服到你深信有機會成功，咁個個就由免費變付費，人人交幾萬元去跟進，一個幾萬元，一百個就有幾百萬元。

呢類課程，部分不是騙人（否則難以繼續），但所教的，傳統傳媒肯定冇，慢慢網上「大水塘」就成形了！

曾智華

阿碌開咪