阿碌開咪｜喊到收唔到聲的投資

投資，極少打和的，不是賺，就是蝕。

投資者一定不會是長勝將軍，好運的，開始時可能會撞正或符碌，以為「好易中好易買餐餸」。結果火速心雄，以為自己武功蓋世，愈買愈有信心，重重的一次學費，必定在這種心態下交出，正因「成功乃失敗之母」！

假若一開始就順風順水鋪鋪成功，未經真真正正的「森林法則」磨練，咁日後的學費，必定交得金兼勁。

不少老手投資者，都交過一種學費，叫做「超人學費」，意即——切勿與超人鬥智！

點解佢係首富？因目光如炬，透視力過人，掌握大勢外，玩財技冇人夠佢叻，因為自己身懷絕技外，亦絕對肯花錢請國際級財經高手做顧問，睇通全球金融領域的日月精華。

小弟十年前開始在電台節目不停宣揚一套金科玉律——誠哥沽的，勿接！誠哥買的，要跟！

簡單，好野點會畀你吖？但超人睇中的，多在冇乜人知的「微時」，你知道又跟到即發達。例如Zoom！

接超人貨者，不少苦不堪言，但……係你自願㗎喎，喊都冇人同情啦！

大家可記得二○一七年超人出售七成半中環中心業權？當時升到嘭嘭聲，不少財團以為執到中環一級商廈，肯定是鑽石，紛紛又集資又借貸，去接超人的貨。

結果？想知，大家有機會問吓「小巴大王」馬亞木啦，佢有最清楚的到肉經驗啦。

前晚飯聚，碰上童年老友肥K，苦口苦面：「碌Sir，若早早肯信你的超人理論，就唔使蝕到喊阿媽啦，唉……」苦酒一灌而清。

乜事？正因早年領展上市，掀起房託基金熱潮，各大財團紛紛將旗下二、三綫產業打包上市集資（掠水？），當然有超人分啦。佢將長實旗下內地物業打包，取名「匯賢產業信託」，號稱第一隻房產基金以人仔計價，上市價五元二角。

肥K一聽超人個名就撲去申請，揸到成手貨。十一年過去了，隻「野」如今只值一蚊雞左右，問你死未？

曾智華

 

阿碌開咪