樂●活｜母親節可以8人一枱啦！

今早剛公布部分社交距離措施進一步放寬，其中食肆堂食會提早於星期四（5日）開放每枱8人，更可延長營業時間至凌晨12時。嚟緊星期日（8日）係母親節，咁咪可以稍為多少少家人一齊出外慶祝！

不如約定媽媽、婆婆及嫲嫲或太太到海洋公園以最窩心的豐富美饌，向她們表達愛意。即日起至5月9日海龍王餐廳及爐炭燒會有節日晚市套餐。前者有十道菜式嘅套餐先以松露蝦多士、芥末翡翠螺、 金磚豆腐及芝麻醬青瓜雲耳伴萵作頭盤喚醒味蕾，接着有富含蛋白質、氨基酸和礦物質的竹笙燕窩羮，滋陰養顏。主菜有砵酒燴牛小排、松露醬炒蘆筍帶子蝦球、鮮甜百合蟹菘上湯泡菜苗，以及瑤柱鮑魚海鮮炒飯。最後，幼滑的杏仁士多啤梨慕絲為滋味旅程畫上完美句號。至於爐炭燒供應嘅十道菜式套餐就完美展現泰北菜精髓，先以四款加入現代元素嘅傳統泰式小食作頭盤，包括泰式青木瓜沙律、泰式新豬肉生菜包、傳統泰式雞肉沙嗲串，以及泰式蝦餅。接着係餐廳主打菜式香茅椰汁雞湯，呢個湯甜中帶檸香、濃度與肉味均衡，口感柔滑。主菜就有外層香脆、充滿泰式風味加上肉汁滿溢的美國安格斯紅屋牛扒，以及泰式甜酸魚、惹味泰式炒通菜和菠蘿海鮮炒飯。泰國美食之旅當然不少得以香芒糯米飯作結。

至於5月7至8日母親節周末，水都餅店更準備了綠茶紅桑子慕絲蛋糕、意式芝士鮮果杯、朱古力士多啤梨慕絲及母親節朱古力畀大家，為女王們送上「甜入心」嘅驚喜。

除咗美食之外，海洋公園仲搜羅咗一系列母親節精品。即日起至5月 8日，於公園精品店選購任何香港製造嘅Boshu布薯手袋及Rosy Garden首飾可享85 折；另可以特惠價$2,520購買原價$7,980、以18K金鑲嵌鑽石及粉紅藍寶石打造嘅海洋公園 x justgold限量版閃鑽包包吊飾。另於即日至5月8日期間，購物淨額滿$450更可免費獲贈LOZ 盛夏花系列積木。

至於香港JW萬豪酒店就有由米芝蓮中菜廳萬豪金殿JW咖啡室、The Lounge及Dolce 88都有特別為母親節準備嘅菜式。其中萬豪金殿於母親節準備滋補養顏的八道菜午市套餐和九道菜晚市套餐，精選菜式包括天籽蘭花響螺燉花膠、翠田種玉、椰汁桂花蘆薈拉絲雪燕及金菊桂花果凍等。另外，自選菜譜就有金殿乾鮑魚酥、金殿花膠鮮魚湯和杏仁濃湯煎花膠等，最啱鍾意傳統粵菜嘅媽媽。

JW咖啡室嘅自助晚餐亮點包括有蟹腳、波士頓龍蝦、即製手握壽司和剌身、燜5至6頭南非鮑魚、蠔皇燜花膠和海參、避風塘炒蟹及花膠海椰皇螺燉湯等。

想悠閒地同媽媽傾偈說心事，可以去The Lounge邊睇住靚景邊邊品嚐精緻美食。建議可由以豪華香檳早午餐開始，可以享用源源不絕嘅酩悅（Moët & Chandon）香檳，以及自助餐桌上嘅麵包蟹、紅蟹、波士頓龍蝦、矜貴魚子醬、香煎鴨肝、西班牙黑毛豬火腿及精選烤肉等。又或者可以揀選下午茶套餐，品嚐擺放在銀器架上的中西式鹹甜美點，如鮑魚撻、龍蝦沙律配魚子醬及士多啤梨、虎蝦春卷、接骨木花慕絲、焦糖檸檬蜂蜜慕絲，以及英式原味及提子鬆餅等，盡享慢活二人世界。

 

另外，Dolce 88為鍾愛甜品的母親推出節日限定抹茶紅莓白桃蛋糕，令媽媽們心花怒放。餅師亦為母親節準備了一系列特色甜點，包括芝麻榛子撻、柑橘歌劇院蛋糕、櫻桃布朗尼及法式蘋果撻等。

作者：Laurie Wu（愛保健愛旅遊愛購物的熟女）
[email protected]