阿碌開咪｜大把高質公關人才

眾所周知，政府長期急需公關人才，處理千頭萬緒的形象建設及「補鑊」，早前已在政府內打鑼搵人自薦考新聞處處長。

結果點，我唔知。只知目前外邊有不少高質公關專才正在「悠閒」。若政府有誠意，條件啱，加上「領袖英明」的話，大把有得揀！

剛剛遇上啱啱，政府快換屆，若新班子領導合人才「眼緣」的話，相信不少叻人願意拔刀相助。

究竟有邊個犀利人馬「得閒」呀？

第一個，教父級的張樹槐。佢退休兩年幾，但精力仍超級澎湃，唯有日日呢度跑嗰度跑（馬拉松）去宣泄。以佢在公關界的江湖地位，若政府能羅致佢，肯定形象大有改善。「水哥」人緣特佳外，仲有一味強項——「上司緣」！在恒生銀行工作幾十年，經歷N個總裁，個個夾得如魚得水。呢下功力，小弟未見過！

另一位，也是公關界教授級人馬，人稱「高佬關」的關則輝是也。CF剛剛由恒隆集團退休，臨離開仍來一個大型活動，全港派發「抗疫關愛包」（咦，有個「關」字噃），大大提升集團的慈善形象。關則輝歷任國泰、新創建及恒隆集團公關部掌門人，能力口碑載道。若我係下屆政府阿頭，唔使諗，立即一手拉佢簽足五年約，鎖住呢位公關猛人，起碼搞掂一瓣。

上述兩位皆男性，咁女性又如何？又有一位可立即上馬！正是剛剛宣布七月退休的恒生銀行企業傳訊總監May Wong。佢正正是二○一九年接「水哥」張樹槐手的大姐大。轉眼夠六十，決定退休。哈，點解咁橋，又係時間啱啱好，撞正政府換屆的呢？

May Wong強項為應付外國媒介，因明珠台記者及主播出身，英文流利到震。香港乃一國際金融中心，有佢守在前綫，放晒心！

此外，馬會也有不少公關專才可撬。政府內部的，你睇近日隔離中心形象幾掂？不停有中港傳媒作正面報道。揸Fit位「老謝」，特首快說佢掌管新聞處啦！

曾智華

阿碌開咪