阿碌開咪｜BadLeader特徵

任何活在政治或傳媒江湖者，無不感到近日炮聲隆隆，飛沙走石。

某資深政治評論員拉我講：「碌Sir，邊個話下屆特首選舉未開始？哈哈，你估要報名先算㗎咩？唔理咁多，你未報名都先轟到你飛起先！」

佢講邊個開火、邊個被轟？我不甚了了。只想研究開火者提出的理由，是否充分？

例如，其中一位開火者，為「姐姐」葉劉淑儀，我就認為唔多應該嘞，因有角色衝突。

例如，特區政府管治機器，除特首司長局長外，行政會議也是極重要一部分。理論上，所有政府重要決策，都應先徵詢行政會議同意。意即內里成員要「集體負責」，唔應該在行政會議內開完會，出嚟講相反意見，這個絕不合乎「政治倫理」。

葉劉身為行政會議成員，講到好似政府不少失誤唔關佢事，未免太過「A字膊」。當然，路人皆見佢屆屆都想選特首。但正路是，若你成日唔贊成政府這樣那樣，為乜唔先辭職而再用KOL、政治評論員或立法會議員身分，名正言順批評呢？

現屆特首招來N咁多批評，當然唔抵幫，因實在……屢次民意調查已清楚顯示一切。

再講講上周馬時亨的一封於本報刊登的來論，當中引述李光耀指出，一個成功政治領袖，應懂得——Get the right people to the right place！

究竟林鄭能否做到？自有公論。

不過，其實肥馬漏咗另一更重要部分冇引述，可能佢「君子留一綫，日後好相見」啩？咁，好啦，等小弟補埋李光耀另一句更重要關於領袖的論述啦，正是——Bad leaders drive out the good！有如經濟理論中的「劣幣驅逐良幣」！

歷史屢屢證明，一個具魅力的明君，必有大量賢才爭相獻身輔助。

相反，又冇魅力，又冇能力，又不懂尊重人才的一個符碌者坐上領袖位，咁哪會有「良幣」肯加入陣營呢？

曾智華

阿碌開咪