阿碌開咪｜玩殘香港大球場

上周初，新聞版內頁標題——大球場「大縮水」，四萬座位減至九千。

　　我的第一反應，是個心MM聲。然後，不期然問：「今鋪，又想玩乜野呀？」

　　這正是一個與香港大球場同年長大，見證佢被「摧殘」的香港仔心聲！

　　香港大球場，前名政府大球場。一九五五年落成，是香港的重要地標，足可容納二萬八千人。當年，正值香港足球黃金年代降臨，有「亞洲足球王國」美譽。所有大型賽事，尤其南華、九巴、愉園、精工、東方、星島等對疊，必安排上大球場，因肯定爆瀉。一瀉，四面立即掛出紅旗。遲來球迷，只有冒險爬山睇。當年並冇電視直播，只有電台講波。

　　政府大球場的存在，正正見證香港足球的最輝煌一頁。

　　至上世紀九十年代，大家有共識，香港需要一個更大型的體育場地，除舉辦國際體育賽事外，更可製作大型演唱會（因紅館座位少兼長卜滿）。於是，扑槌十億元改建，馬會資助八億元（我哋大班死心塌地馬迷有分認捐！）。

　　既然想做演唱會，當然要考慮噪音控制。起初設計，是活動天幕，坐四萬人。點知，發展下去，有三大令人「遺憾」情況出現：一、起起下唔夠錢，取消活動天幕（即噪音會溢出 ）；二、設計上冇咗田徑跑道，不能做全能運動比賽場地；三、草皮質素及去水系統全面不合規格。

　　邊個要負責？政府高官個個卸膊。結果，一個四萬人場地無法舉辦音樂會，令簽長約買晒貴賓室的大公司MM聲，白畀貴賓室租。草地質素慘被嘲笑為「薯仔田」，根本無法舉行球賽，搞到有成年要冚檔重鋪，再花上天文數字。

　　到今天，喂！球場靚好哋哋，竟又想拆咗佢，縮水變咗九千人？敢問是邊個蠶蟲師爺的構思？所為何事？啲錢係你嘅會唔會咁搞法？係，球場應該再改回有跑道的運動場。最佳，當然將天幕拆改成活動化，仍坐四萬人，咁就最理想。

　　邊個高官敢企出嚟同我辯論一下呀？

曾智華

阿碌開咪