樂●活｜聖誕好去處（三）

繼續介紹聖誕裝置，除咗噚日介紹過嘅日本、韓國嘅卡通人物聖誕裝置和打卡位外，仲有歐洲嘅卡通人物代表，帶嚟歐式聖誕之旅。

交叉嘴加上圓圓大眼嘅miffy聯同一眾好友由荷蘭遠道來到MOKO新世紀廣場，以北歐簡約清新的水彩格調打造miffy 北歐冬雪藝術村。3米高嘅miffy喺中庭迎接大家，仲有匿喺miffy後面嘅Boris喺度砌緊雪球、Uncle Pilot就坐住熱氣球前來集合，至於火車站旁嘅長櫈就有Melanie坐定定等緊同大家合照。遠到而來嘅miffy更會喺12月4日開始，聯乘潮流家品店HOMELESS喺MOKO新世紀廣場舉辦MOKO聖誕別注miffy x HOMELESS 北歐冬日精品市集」，將充滿濃厚聖誕氣氛嘅北歐風格小鎮木屋商店帶到商場中庭，售賣多款聯乘嘅家品用具、公仔、裝飾品、口罩等。

順帶提提各位家長，MOKO 3樓嘅戶外兒童遊樂場—MOKO 動樂園！將於11月19日以全新面貌開放，並劃分為四個專區提供玩樂、探索、教育、休憩及打卡等多元化消閑體驗 。園内有近50米嘅全港最長攀爬牆、8米高的大型遊樂設施、多條山丘及山洞探索隧道及6組不同高度的滑梯，最高的一組滑梯更高達3.8米，最啱晒小朋友去放電要求。

至於同聖誕老人一樣來自芬蘭嘅Moomin姆明家族就會喺即日至11月29日喺銅鑼灣時代廣場開設Moomin - The Spirit of Adventure，等大家分享出遊Camping享受冒險樂趣。一向富有冒險精神的姆明，揹著大背包、帶同充足裝備站在北歐風的小屋門外向大家展示「The Spirit of Adventure」，分享對生活總是充滿冒險而樂觀的精神，亦提早向大家送上聖誕祝福。在期間限定店外可以跟姆明、歌妮、史力奇、小美等，於森林木屋前露營兼打卡。場內設多個打卡位，並出售多款獨家限定主題商品，包括姆明睡袋造型抱枕、露營燈、野餐墊、木製托盤等，買滿指定金額更可獲得獨家限定姆明禮物包裝花紙，作為個人收藏或用來送禮都極之適合。

除咗Moomin - The Spirit of Adventure期間限定店，場內更設多個人氣卡通專區，包括宮崎駿系列、KAKAO FRIENDS、LINE FRIENDS、Sanrio系列等，更有小王子、Snoopy、角落生物、LULU豬、各款日本吉祥物，最啱大家揀定聖誕禮物。

作者：Laurie Wu（愛保健愛旅遊愛購物的熟女）

[email protected]