【阿碌開咪】絕不合理的資產值

經營內地東北地區吉野家業務的老牌上市公司合興集團（0047），上周四以涉及收購及合併守則待發內幕消息為由，宣布短暫停牌。停牌前股價「搞笑」，只得四仙六！

　　意即，成個集團市值只得四億六。老友，即係點？即係得一間豪宅價錢！

　　但是，先不論物業，究竟集團擁有乜呢？擁有「吉野家」品牌，亦擁有「冰雪皇后」品牌，集團在北京、天津及河北生意，非常不俗，並正在準備作進一步的合併收購。

　　老香港無不知悉，合興乃有近九十年歷史的老字號，在內地及香港擁有工廠及碼頭，主攻生產花生油等多種食用油。二○一一年以34.75億元收購大股東洪氏家族擁有的兩家快餐連鎖店——吉野家及Dairy Queen的特許經營權。

　　合興股價兩年多前仍有一角五仙，但自從集團行政總裁洪明基捲入「政治言論」事件後，合興股價立即江河大瀉，一跌不止。

　　擁有近七成半股權的大股東洪氏家族，最清楚合興的真正價值，跌到如此一仆一碌，真係唔私有化咗佢就笨啦。睇嚟，揸咗另外兩成半街貨的小股東，發達矣。

　　其實，若大家做下功課，必定發現像合興呢類「資產值」與股價完全不合比例的上市公司，着實不少。

　　通常屬老字號，大股東揸住壓倒性控股權，股價長期不合理地偏低。

　　隨便舉兩個例子。第一，佳寧娜集團（0126），股價長期徘徊在六角至八角之間，市值僅僅十億多元。但是，若你打開它的生意版圖看，單單深圳市的一座集團中心價值，已遠超其股票資產值，更何況，佳寧娜在香港、佛山、湖南、南昌……也有大量投資及物業呢！

　　另一家上市公司，資產值更荒謬，正是稻香集團（0573），股價約九角，市值九億多元。為何我話佢荒謬？不講其他，單講稻香在東莞的超級酒店、食品製造及飲食城，已值不知多少個九億！如今的市值，隨時私有化都發大達！

曾智華

阿碌開咪