【阿碌開咪】《蔡瀾花花世界》示範

每日晚飯，由七點半開始，我會先睇now新聞台（比較中立及有英超精華！），再轉過YouTube睇一眾KOL講乜。

前年至今年中，差不多鎖定睇評論政治時事的KOL，因發生的事，實在太重要。

但隨時間過去，加上尊重家人的選擇，開始撳下呢度，撳下嗰度，接觸更多不同類型KOL。

漸漸，時事KOL，愈睇愈少了。原因：

一、太長氣——難明佢哋點解講極唔完。明明十分鐘應該停，但卻死拖爛拖。結果，本來精闢扎實的變疏鬆滿水分。做傳媒，無人不知長度與吸引並無等號。見好，應該即收，不能為講而講。

二、立場（偏見）太鮮明——絕大部分KOL，未開口已知佢對每件事的立場與看法，絕少跳出框框畀人「Speak out of the box」的新鮮感。可能大部分觀眾「嗜辣」也。 所以，言論多數「無激不歡」。如此，失卻對事理的深入分析，追求客觀持平的知識分子型，大感冇癮。

三、出招太密——不少KOL，可能需要極強存在感。所以，一日內可能不停出帖。簡直到咗「係又講，唔係又講，有料又講，冇料都講」的濫。哲學大師李天命所言——多見生厭。正正發生在個別有點自戀成狂的KOL身上。不過，好似冇人提佢哋，亦冇乜邊個有自知之明。

四、慢慢離地——個別情況，離開香港後，可能要兼顧當地生活或接觸多非香港事物及資訊。再者，人不在香港，好難有直接「香港人」的感應。故此，慢慢有點「離地」。評論時事，可能重點及到肉方面甩甩哋。

眾多KOL，其實有兩款做得唔錯，介紹樓盤的，通常短小有趣，點到即止。相對成功，正是《蔡瀾花花世界》。果然大行家，蔡生每集僅講至十分鐘，內容充實、資料豐富。加上佢豐富識見，總能帶出新鮮感。

最重要，全部在你仍投入時就完，等你不停再開下集追下去。

高手也。其他KOL應快學習！

曾智華

阿碌開咪