【阿碌開咪】不可思議變平常

每朝打開報章（我堅拒用手機讀報，因冇情趣兼壞眼），皆發覺有「不可思議」新聞。前天《星島日報》獨家報道，前刑事檢控專員梁卓然，或任高院暫委法官！

我一睇，衝口而出：「喂喂，唔係啩？」

打咗個突，點解？上周全港法律界震晒，正因上訴庭揭發一宗販毒冤案，而當中的「主角」之一，正是時任刑事檢控專員的梁卓然。佢竟在原審法官陳慶偉高調質疑律政署的檢控下，仍然指示外判大律師周嘉明去馬硬闖！

如今衰晒，變冤案。這個記錄，橫睇掂睇都「好惡睇」！咁都可以變高院暫委法官，大家話啦，係咪有點「不可思議」呢？

另一單頭條，也令人窒一窒。因本來由電檢處（好低層次）負責的電檢工作，突然坐火箭般爆升，去到交由政務司司長話事。另外，《2021年電影檢查（修訂）條例草案》中的一項，是建議賦權督察可在沒法庭手令授權下，進入和搜查任何地方，並停止未經授權上映或發布的影片。吓？督察咁「低級」，已可冇法庭手令強闖？

且看條例上立法會時，可有議員能夠提出化解「不可思議」的論點嘞。

最後，講講國際版頭條，更令人O嘴。

標題：《CIA局長晤塔利班領袖》。

吓？乜在美國眼中，塔利班唔係恐怖分子嗎？二十年前殺入阿富汗，所為何事？乜如今竟可坐低有偈傾？

不過，講真，若任何睇過美國真實紀錄片及CIA退休高層寫的回憶錄者必知，中央情報局並非甚麼公平正義或守法忠良機構， 反之，是打着「國家利益」旗幟，乜都做得出的「兇殘組織」，包括捏造（監生屈）中東弱國有「大殺傷力武器」而濫炸濫殺無辜；謀殺外國政要；串通毒販搞局，針對「更高目標」；抹黑任何敵對國家的一切，鼓動美國人仇恨情緒……所以，當有「需要」時，與「恐怖分子」Make Deal，也由「不可思議」變正常/平常了。Understand？

曾智華

 

阿碌開咪