【阿碌開咪】守得雲開見「屯馬」明

初做傳媒，接觸部分「社會運動家」，已覺佢哋視野極狹窄。對！當中不少真的為民請命，對任何政府不公平政策，以及社會上一切不公義（貧富懸殊、分配不均、官商勾結、貪污舞弊……）之事，皆會發聲。我做傳媒的，最清楚邊個真為社會大利益，邊個則純搞煽情抗爭拉有私人利益者選票，爭取政治本錢。

最近，董建華拋出兩個字——遠見，引起好多人辯論。董伯伯指不少移民英國者冇遠見。係真唔係真？決定連根拔移走者，自有其私人理由，講多無謂。

不過，去到社會大利益，又唔同。小弟必須指出，個別自私政客，嚴重欠遠見。聽佢哋講，香港真係會瓜得！最少變第三世界！

舉例，N年前政府決定起海底隧道，當時有政客立時撲出，指勞民傷財，認為：「加密汽車渡輪班次咪得囉！」

你話係咪超級戇居？信佢一成，雙目失明！

好嘞，不久之後，政府公布決定大力投資興建港鐵，一班無聊政客又再飛身想阻頭阻勢，堅持增加巴士、小巴、的士、渡海小輪及電車已足夠。當時最激進政客，更揚言絕食，以阻止工程進行。如今回望，係咪目光如豆？怕且，如今佢日日搭港鐵及住在港鐵上蓋呢！

無人能夠否認，港鐵對香港整體經濟發展的重要性，總之鐵路去到邊區，邊區就起飛，冇得唔服。以我為例子，住土瓜灣附近，真係等到頸都長，希望屯馬綫早日通車。

屯馬綫全長五十六公里，有二十七個站，簡直是蜘蛛網的中心，可以通過六個站轉綫。二十年前睇設計圖，小弟真係高興到彈起，因一旦興建完成，除自己方便外，附近必定急速變成一個「升呢區」，出現新氣象。

可惜，慘……受沙中綫偷工減料影響，拖呀拖，延呀延，頸都長埋，心都實晒，仍未有通車日期。終於，今次真係守得雲開見「屯馬」明嘞。聽講已試行成功，只待政府扑槌就可開波。真㗎，我真係想錄條燒炮仗片賀下佢㗎！

曾智華

阿碌開咪