【阿碌開咪】宅下宅下宅到慣咗

一個心理學研究，發覺人是很容易適應的動物。大部分事情未發生時，可能極擔心，但發生後，只要日復一日不能避免，整整下就會成為生活一部分，不再覺得難受。

小弟初初聽到呢個講法，唔多信，但回顧個人的經歷，咦，又好似全中噃。

例如坐長途機，起初幾小時真真痛苦萬分，坐立不安。但通常過咗六小時後，就會開始接受，再變慣性，冇晒不安或者痛苦之感。

試過問坐過監者，講法相若。起初好惡頂，冇冷氣、冇私隱、冇美食、冇酒飲……冇自由。哈，原來經過一段時間，會習慣㗎。這就可以解釋，點解有啲積犯，出獄後好唔適應，刻意犯法博再踎監嘞。

其他身體細節如是。起初戴眼鏡、口內有假牙、斷骨體內有鋼片，初初唔會舒服，整整下你會漸漸忘記有回咁事！

講講我自己。二○一五年右眼中風，眼下半部分有大嚿黑雲物體（其實係大塊瘀血）遮住，睇唔到野。起初真麻煩，兩眼視力不同，右邊烏雲密布，左邊非常清晰，有礙閱讀、睇電視及電影，揸車也要格外留神。哈，呢種感覺，三個月後，自己會不覺地忘記咗右眼有嚿黑雲，閱讀看戲，已唔記得咗佢存在，雖然其實右眼下半截仍矇查查。

今日講起呢個話題，乃因一年前，相信冇人想像到大家可以「咁適應」疫情生活。

人，真係煮到埋嚟就食。雖則唔想，亦唔願意，但既已發生，初初當然惶恐不安。到如今？你戴住個口罩出街，已呼吸再冇困難，反而唔戴仲船頭驚鬼、船尾驚賊，一方面怕畀人告，又怕畀人牛咁眼矋住，最重要，大佬，唔知周圍的人有冇病毒，都係戴返穩陣囉。

小弟社交生活又如何？未有疫情前，一年出外旅行十幾次，每周出外晚飯四次，因天生過度活躍症，唔搞搞震會精神抑鬱。結果又點？個個老友跌眼鏡。原來我日日宅在家都可以愉快舒暢好享受，冇再恨出外旅行及晚餐了，真真神奇！

曾智華

阿碌開咪