星岛日报

【阿碌开咪】宅下宅下宅到惯咗

2021-02-02 08:17
一个心理学研究,发觉人是很容易适应的动物。大部分事情未发生时,可能极担心,但发生后,只要日复一日不能避免,整整下就会成为生活一部分,不再觉得难受。

小弟初初听到呢个讲法,唔多信,但回顾个人的经历,咦,又好似全中噃。

例如坐长途机,起初几小时真真痛苦万分,坐立不安。但通常过咗六小时后,就会开始接受,再变惯性,冇晒不安或者痛苦之感。

试过问坐过监者,讲法相若。起初好恶顶,冇冷气、冇私隐、冇美食、冇酒饮……冇自由。哈,原来经过一段时间,会习惯㗎。这就可以解释,点解有啲积犯,出狱后好唔适应,刻意犯法博再踎监嘞。

其他身体细节如是。起初戴眼镜、口内有假牙、断骨体内有钢片,初初唔会舒服,整整下你会渐渐忘记有回咁事!

讲讲我自己。二○一五年右眼中风,眼下半部分有大嚿黑云物体(其实系大块瘀血)遮住,睇唔到野。起初真麻烦,两眼视力不同,右边乌云密布,左边非常清晰,有碍阅读、睇电视及电影,揸车也要格外留神。哈,呢种感觉,三个月后,自己会不觉地忘记咗右眼有嚿黑云,阅读看戏,已唔记得咗佢存在,虽然其实右眼下半截仍蒙查查。

今日讲起呢个话题,乃因一年前,相信冇人想像到大家可以「咁适应」疫情生活。

人,真系煮到埋嚟就食。虽则唔想,亦唔愿意,但既已发生,初初当然惶恐不安。到如今?你戴住个口罩出街,已呼吸再冇困难,反而唔戴仲船头惊鬼、船尾惊贼,一方面怕畀人告,又怕畀人牛咁眼矋住,最重要,大佬,唔知周围的人有冇病毒,都系戴返稳阵罗。

小弟社交生活又如何?未有疫情前,一年出外旅行十几次,每周出外晚饭四次,因天生过度活跃症,唔搞搞震会精神抑郁。结果又点?个个老友跌眼镜。原来我日日宅在家都可以愉快舒畅好享受,冇再恨出外旅行及晚餐了,真真神奇!

曾智华

阿碌开咪

最新回应

關鍵字

热门文章