寫字樓商鋪跌價 可增整體競爭力
2020-06-12 00:00(星島日報報道)面對經濟下滑衝擊，陳茂波表示，觀察到寫字樓、商鋪、工廈物業價格，全部下跌。「寫字樓跌咗一定幅度，商鋪都係，租金都跌咗，但我哋覺得呢個調整都係有秩序，唔構成系統性風險。」他指，香港寫字樓貴、鋪租貴，影響香港的營商成本和競爭力，「所以佢有秩序地下調，我們覺得無問題，只要它不會做成金融方面嘅系統性風險，由得佢有秩序咁調整。」
至於住宅樓宇方面，陳茂波指調整得好慢，「如果同去年高峰期比，跌咗少少啦，但都未返番去舊年年頭，所以仲係高嘅。」對於最近有人提出樓巿「減辣」，他直言：「我哋諗都唔諗，因為我哋覺得住宅物業巿場，依家仲係咁貴。」
過去十多年商鋪租金上升，其中一個動力是自由行。對於未來旅遊業，他認為香港旅遊業要邁向高增值，不能單靠數量，「旅遊對我哋都重要，因為佢拉動好多行業，包括消費、餐飲」，但他強調香港地方細，有容量制約，所以成個旅遊業都會有一個調整，在發展旅遊同時，爭取高增值旅客，「要兼顧七百萬人城巿的制約，兼顧巿民的生活方便。」他認為，香港高增值旅遊仍有優勢，「香港餐飲係世界難得地方，食乜都有，好多好好餐廳，對高增值客有吸引力」；西九文化區亦可作為國際大都會的另一個賣點，「以西九的場地、設施，提供服務當然不止七百萬人，若能吸引世界級藝術家表演者，亦可以帶動相關旅客。」他指，旅發局正多管齊下發掘不同的旅遊資源及旅客群。
關鍵字
最新回應