【維港會】黃大仙居屋同事豪言永不住新界 嘲車程遠被網民轟歧視

「寧要市區一張床，不要新界一間房」？有網民發文指，其一名居於黃大仙居屋的同事，在飯聚期間不時對居住新界的同事冷言冷語，揚言永遠不會住新界，令網民等人覺得是偏見及歧視。

事主在「香港討論區」發文，透露同事住九龍近黃大仙居屋一房單位，「話去邊都方便，每次出來食飯都會在同事面前大聲話一世都唔會住新界樓」，席上有同事住的屯門瓏門，將軍澳南CAPRI，日出康城緻藍天、LP6、元朗Grand Yoho。 網民形容，同事每次食飯被迫聽同一番說話。

事主舉例，對方經常食飯時自發話要去人屋企探人或參加喬遷聚會（house warming）， 「去完又話人主人房細、地方遠，唔需要買3房，死都唔會住新界，將軍澳都唔得。話黃大仙是九龍東，市區核心地段，近鑽石山沙中線概念，同去邊都方便，包括過海」。對方又藉機貶低住新界同事交通不便，「你地住咁遠，假期仲會唔會出九龍行街?」事主直言，「條友久不久就話要來你家，明知來咗轉頭會同第二個講你家好遠好差乜乜乜，我次次藉故推佢又好為難。」

有網民也遇過類似的人，「新朋友住九龍東某居屋，開頭我話住新界，佢好藐視咁話格(隔)涉，有次成班朋友中環出發上我屋企玩，叫佢落車，佢好似如夢初醒咁講『咁快到？』上到屋企，佢話住新界真係好，呎價平可以買大啲然後我話係呀...企幾大幾錢呎，佢又唔答返我。」

其他網民都不認同有關講法，「可能佢心裏面不知幾羨慕人哋住新靚樓同有會所呢，其實無得比，住開新界會覺得新界好，反之亦係，市區都有分地段，中環紅磡何文田嗰啲梗係好，黃大仙就算吧啦，我都好怕呢啲人，為咗抬高自己而踩低其他人，無品到爆。」；「方唔方便，睇你生活圈啫，如果你係中大教書，唔通你會放棄又大啲，又平啲，又空氣好啲嘅大埔，沙田單位，走去黃大仙住咩」；「新界空氣好，住九龍區點敢長開窗」。

也有人認為無需介懷，「其實置業使乜理人點睇啫？或者人哋唔鍾意新界樓唔值得評論額，你有你喜歡啫」、「香港有幾大啊，唔明白啲人成日話唔方便，遠及山卡啦，尼啲人去外國一定住唔慣」。