阿碌開咪｜一百萬元一首都唔唱

巨星世界與普通人世界，是兩個世界。普通人，可以優哉游哉，自由通街走（通街踎也無不可！），行到邊食到邊，着乜冇人理，講乜野冇人聽，平民生活，其實真係好快樂。

巨星又如何？剛剛相反。為顧及形象及身價（不但考慮佢自己，更包括背後的電影或唱片公司、製作公司、經理人公司及大批助理等等的飯碗！），絕對冇「自由」！包括亂穿亂講亂跑的自由。更避忌，涉及意識形態的，包括宗教及政治，一律應該話往肚里吞，否則，可能帶來嚴重後果。

此外，曝光更要拿揑精準。尤其在舞台、電視、電影及各種媒介。因為適當曝光會提升身價，不適當則相反，變自貶身價。

小弟在傳媒行業多年所見，百分之九十九名人（巨星、富豪、高官），全皆非常小心曝光，絕對計較，自己唔識計，身邊及背後也有大量「精算師」替佢哋計。

上世紀八十年代初，與一窮家出身的DJ歌手閒談，佢笑笑口話：「碌Sir，我目前身價，出一場Show可以叫價五萬至七萬元（記住，係上世紀八十年代初！），但我電台人工只有三千幾元！」

「若果叫價低少少，會否能夠密密做呀？」

「唔得！曝光，物以罕為貴！你估我想企硬嘅咩？但一降價，即變唔馨香，藝人身價向下調乃項大忌！不過，講句笑，若果你唔使我出樣，冇人知係我在唱歌，三千蚊一場都????飯應！」

自從內地市場打開，巨星衡量曝光的身價，更上N層樓，簡直飛升。點計呢？頭都爆！呢方面，香港經理人陳家瑛（藝人王菲）及陳淑芬（前張學友經理人）絕對是專家。

香港經典歌手，亦因內地電視台收視大盛，極具身價。最近，就有一家電視台出手一百萬人仔，請某香港歌星唱一首歌，更不用返上去，在香港攝錄已可。

聽落好筍，但結果經理人一口拒絕。點解？普通人一定嘩嘩聲，唱首歌一百萬人仔都唔殺？

我聽完原因，百分百合理，一千萬元都唔殺！

曾智華

阿碌開咪