阿碌開咪｜有冇人期待你出現？

近年遊走各大機構、團體、學校，分享各種人生經驗，由家庭到事業，由投資到健康，由飲食到旅遊，真係瓣瓣都涉及。

當中不同年齡層的聽眾都會問道：「碌Sir，你認為一個人活在世上，點先算得上成功？」

小弟N年前已經不停思考這個問題，大概四十歲左右，得到一個非常肯定的答案：「日日有人期待你出現！」

俗世社會，大家活在資本主義中，都會追逐名、利及權。所以，大部分人都有個「錯誤」價值觀念，以為一個人擁有權力、擁有財富、擁有名氣，就等於成功。

我很早已提出疑問：「你有權，你有名，你有利，關人乜事？你可有為別人的幸福、生活、前途、健康、快樂……作出任何貢獻？」

若答案是「冇」的話，你擁有的名利權，四個字講晒——關人鬼事！尤其在自由社會，根本冇人需要尊重你。聽到最多，在草根茶記，當電視出現某某大官、名人及富豪時，在座街坊輕則當佢透明，重則叫夥計：「唔該熄機或轉台，冇興趣見到呢條友個樣！」

呢呢，這就是民意，非常貼地又直接。

總結，失敗的人，正正是個每日「冇人期待你出現」的人，無論你擁有幾多幾大名利權。

相反，成功的人，正正是每日有大量人期待佢出現的人。

意即你的出現，令大家感到快樂、幸福、充實。總之，就是Feel Good！如此，你存在這個世界才有意義，對自己有意義，對別人有意義。到此境界，就不枉此生，真的成功了。

今日長篇大論，無非想帶出一位人辦，佢凡出現，就令人Feel Good——「修哥」胡楓。真犀利，九十歲，仍未見人稱佢做伯伯，笑佢老，又或覺得佢演藝事業及健康在衰退中。全部冇！點解？正因修哥活得有意義，一日都有無數香港人期待佢出現，尤其是在護老院的長者，真是——我一見你就笑！故此，胡楓《人生90好楓Show》演唱會，有無數期待，肯定成功。

曾智華

阿碌開咪