【阿碌開咪】《城市論壇》的來去

今日標題，本來是寫《城市論壇》生與死的。不過，想深一層，節目可能只是暫停呢？用到個「死」字，有點過分煽情，收返！

　　近幾日手機不停彈出訊息（我不直接聽電話，免煩，尤其應酬無聊騙徒！），N咁多記者邀約訪問。

　　我例必回應：「有乜幫到你呢？」

　　「碌Sir，好想知你一手創辦的《城市論壇》據聞被腰斬，有乜感覺？有乜評論？而對昔日跟過你工作的同事，又有乜看法呢？」以上問題乃一個綜合版。

　　唉……事到如今，有乜好答？於是使出太極絕招——推：「我冇乜野想講。就算想講，都只在個人的『粉絲頁』（Fanpage）及專欄，以保證意見原汁原味登出（即係費事畀你根據你的立場去加『色』啦！）。」

　　《城市論壇》點嚟的呢？當然關政治事。上世紀七十年代尾，英國決定（被逼？）將香港交回中國，立即做兩件大事，令全香港市民都高興的，就是加速大力開放言論、新聞自由及開始地方行政，邁向普選。動機？言人人殊。我只知兩樣都有利當時政府，爭取民心民意民情。

　　小弟被委重任，設計一個類似英國海德公園的自由暢論政事電視節目，現場直播，人人可發言，事前事後不受監控，不會被刪剪。

　　當時的我，僅二十四歲，有此刺激重任出現，當然興奮死，於是連夜疾書草擬節目大綱。更重要，詳盡規劃直播途中，若有突發意外，如何處理，包括：有人講煽動性語言、粗口、搗亂、自殺、動粗……（哈！結果之後全部一一出現）。

　　不太難，只要有足夠工作人員及鏡頭收音調動，已可解決。節目面世後，英國BBC也派人來研究，點解「咁危險」直播節目在香港會冇事發生？

　　一九七九年《城市論壇》正式誕生，至今已四十多年。以人的生命來計，已是壯年末期，開始邁向中年。

　　這年齡，應仍朝氣勃勃，精力旺盛，且漸趨成熟，散發魅力，可惜……（明天續）

曾智華

阿碌開咪