【阿碌開咪】永不放棄治療？

「每個人的價值觀皆不同，請大家尊重互相的自由抉擇。總之，唔影響到你的，咪阻住晒！」

　以上諗法，唔知點解，我讀小學時已孕育，故此，不時被老師責罵，因太「離經叛道」。

　　小弟有乜諗法呢？因個人絕對崇尚自由，當時，睇世界大變化，道德大趨勢，肯定幾項半世紀前「衞道之士」千方百計阻撓的，一定會先非刑事化，後而合法化。

　　包括乜？包括墮胎、同性戀、安樂死！

　　法例應該反映民情民意及人民的選擇自由。以上三樣，你唔鍾意，唔做囉，為乜要禁止別人做呢？我諗極都唔明。

　　其實我對好多人的信念、習慣、做法都唔同意，自己亦非同性戀者，但點都唔會橫加阻攔，奪去別人的自由！

　　又例如安樂死，根本再冇新觀點唔畀垂死病人作一抉擇。道理簡單，擺明一個人已經生存無望，痛苦無邊。點解旁邊班三九唔識七人物，竟可在自己唔使受苦情況下搞搞震，指手劃腳，逼病人受折磨落去？

　　我唔係黑心，只想班大義凜然、行得走得、健健康康而反對安樂死的人，先綁自己在牀三五年，鼻部插喉餵營養吊命，感受一下背部肌肉慢慢爛掉，大小便只可以用紙尿片，不能按自己意願更換的「享受」！

　　好嘞，綁完呢段日子，等我訪問下你——究竟服未？若未服，再繼續！點解咁做？因你正強逼別人在如此受難呀！

　　今日執筆，有啲馨馨哋，因見到「安樂死」搞咗咁多年，例有大群「風涼人」阻住晒，吹脹！早前讀到段文章，深得我心——把握最後時光，好好送別。放棄治療，或是最好的治療！早年我足足有十年不停出入護老院探望先母，見盡無數陷於極度痛苦的絕望者被綁牀上「唔准死」！

　　與所有資深醫護及社工交流感覺（當然更包括無法治療的病患者），一致認為，到某個時候，經某種審定，安樂死乃最人道的做法，連動物都可以用此方法「脫苦海」，為何萬物之靈的人類反而唔得？是否毫無邏輯？

曾智華

阿碌開咪