【阿碌開咪】送馬谷針

三日前「嫩編M」來訊息：「碌Sir，有封讀者信轉寄你！」昨日收到，打開，咦，原來一位名Jackie讀者（男/女？），用端正字體寫出一條好「橋」，託我轉向馬會高層提議，幫手谷針。因為每次賽事日，投注站逼滿人，若馬迷個個打晒針，真係「捐」都「捐」得安心啲。

唔傳畀馬會高層嘞，佢哋最高嗰位係本欄讀者，一定收到，放心！

Jackie非常有創意，佢指出香港馬迷有幾十萬到上百萬（大家單睇合法投注額每個賽日十幾億元，已知幾犀利），相信九成九想一試做馬主滋味，但現實中，九成九馬迷根本只可發春秋大夢，一世都冇機會！因為又要做會員，又要抽中，再要花百萬元計買馬費，另每個月七萬、八萬元養隻馬，完全係富豪級玩意。

不過，「發白日夢」馬迷養唔起啫，馬會或其他富豪馬主，絕對九牛一毛矣。所以，Jackie建議，為谷針，馬會可以高調捐出一匹馬，畀八月底前打完針者抽。馬會提供「全餐」，即馬價、養馬費，以及一個終身會籍。呢匹馬贏到所有獎金，「馬主」袋一半，一半捐作慈善用途。大家話，係咪好鬼吸引？馬會所費無幾，但協助谷針，政治正確，也可帶來轟動宣傳效果，有得諗！相信此消息一出，萬計老中青馬迷即湧去打針，聶德權局長掂晒矣。

過去幾日，天天睇英國馬，最快樂為欣賞一班高水準騎師大拼搏。

呢啲場合，好睇唔好賭，因大家對馬匹實力矇查查。小弟又點？場場買五元複式二重彩，選五隻同程往績最佳者穿勻，唔睇賠率，睡前投注，翌朝睇重播當直播。

結果，第一日就撞中一條派六千七百九十三元二重彩，「安蹄逸」搭「疑情」，五蚊派三千幾蚊，夠玩幾日！

好嘞，明天「精英盃」國際三級賽跑千四米，我會照辦煮碗，選四隻此程未輸過扑二重彩、Q及PQ，即「高大威猛」、「達心星」、「顯心星」及「錶之未來」，睇睇有冇大茶飯食嘞！

曾智華

阿碌開咪