【阿碌开咪】永不放弃治疗？

「每个人的价值观皆不同，请大家尊重互相的自由抉择。总之，唔影响到你的，咪阻住晒！」

　以上谂法，唔知点解，我读小学时已孕育，故此，不时被老师责骂，因太「离经叛道」。

　　小弟有乜谂法呢？因个人绝对崇尚自由，当时，睇世界大变化，道德大趋势，肯定几项半世纪前「衞道之士」千方百计阻挠的，一定会先非刑事化，后而合法化。

　　包括乜？包括堕胎、同性恋、安乐死！

　　法例应该反映民情民意及人民的选择自由。以上三样，你唔锺意，唔做罗，为乜要禁止别人做呢？我谂极都唔明。

　　其实我对好多人的信念、习惯、做法都唔同意，自己亦非同性恋者，但点都唔会横加阻拦，夺去别人的自由！

　　又例如安乐死，根本再冇新观点唔畀垂死病人作一抉择。道理简单，摆明一个人已经生存无望，痛苦无边。点解旁边班三九唔识七人物，竟可在自己唔使受苦情况下搞搞震，指手划脚，逼病人受折磨落去？

　　我唔系黑心，只想班大义凛然、行得走得、健健康康而反对安乐死的人，先绑自己在牀三五年，鼻部插喉喂营养吊命，感受一下背部肌肉慢慢烂掉，大小便只可以用纸尿片，不能按自己意愿更换的「享受」！

　　好嘞，绑完呢段日子，等我访问下你——究竟服未？若未服，再继续！点解咁做？因你正强逼别人在如此受难呀！

　　今日执笔，有啲馨馨哋，因见到「安乐死」搞咗咁多年，例有大群「风凉人」阻住晒，吹胀！早前读到段文章，深得我心——把握最后时光，好好送别。放弃治疗，或是最好的治疗！早年我足足有十年不停出入护老院探望先母，见尽无数陷于极度痛苦的绝望者被绑牀上「唔准死」！

　　与所有资深医护及社工交流感觉（当然更包括无法治疗的病患者），一致认为，到某个时候，经某种审定，安乐死乃最人道的做法，连动物都可以用此方法「脱苦海」，为何万物之灵的人类反而唔得？是否毫无逻辑？

曾智华

阿碌开咪