【人生馬拉松】M+搜羅藝術品 購買過程如街頭銷售

街頭有種銷售手法是這樣的：

　　一個能言善辯的後生仔向一眾準備去街市買菜的婦孺派禮物：「這塊抹布好正，用了納米科技，能除任何污漬，崇光賣緊三十蚊一塊，我而家送畀大家試用，唔收錢，嗱，唔好攞多，一人一塊……攞完聽我講幾分鐘嘢好唔好？」

　　貪小便宜是人的天性，為了一塊免費抹布，聚在那裏聽十分鐘示範，結果，有人用五百蚊買了個煲，有人用六百元買了隻鑊，回家發現那個煲那隻鑊原來只需一百元。都好，至少用得，不是垃圾。

　　情況跟西九文化區那個年底開幕的M+博物館非常相似。

　　二○一六年六月，時任西九文化管理局董事局成員夏佳理的繼女幫忙為M+博物館搜羅當代中國藝術品，並以一億七千七百萬一次過買下瑞士收藏家希克千多件藏品，購買過程像極以上街頭銷售手法。

　　希克先送你幾百件，吹噓這幾百件估值十三億，再賣給你百幾件，這些只收你一億七千七百萬，明益你，抵到爛，手快有手慢冇。

　　不是常常有大隻蛤乸隨街跳，遇到就有買趁手莫遲疑。於是西九管理層召開董事局也非常倉卒，一大疊藏品圖，千幾件藏品的照片只印成郵票般大，董事局成員要在一個多小時的會議中扑槌做決定。有與會者說，時間根本急趕到沒可能看完那千幾件藏品是甚麼貨色，但就像街頭銷售手法，有好多「媒」在旁配合，好筍呀好筍呀，再遲疑錯過機會就後悔莫及，於是，立即拍板，緊接是召開記者會宣佈，讓一切已成定局。

　　原來，這類手法都是千篇一律，被打動者由童叟婦孺到高端精英，都不能倖免。



屈穎妍

原文刊於《頭條日報》

編按原題為:「手快有手慢冇」