【阿碌開咪】紮馬開場實屬正常

上周五邊看電視，邊歎茶記午餐，新聞播出中美外交高級官員在美國阿拉斯加首輪談判。小弟一路睇，一路會心微笑，但旁邊班司機大佬則嘈到拆天，話可能反大面開戰，因未正式進入談判，雙方已因開場白時間長短而搞到黑面。

　　小弟點解會心微笑？因諗起上世紀七十年代，晚晚睇TVB摔角節目，何守信旁白咬牙切齒，七情上面（佢講摔角講到爆紅，成為無記首席主持，要風得風，要雨得雨，因為N咁多人挖角）。

　　另外，又諗起上世紀八十年代認識當時香港政府的「談判巨星」曹廣榮（綽號「肥曹」），長駐歐洲布魯塞爾，天天與各強國代表就紡織業配額「打沙蟹」，鋪鋪希望為香港爭取最大利益。

　　當時肥曹向我這個後輩講：「凡談判，開始時，對方一定木口木面Poker Face，擺出寸步不讓款頭，紮晒馬，個別更揚言若然攞唔到己方想要的，就不惜反枱離場！呢個姿態純為靠嚇，希望對手陣腳大亂。」

　　似唔似當年的摔角？兩座「人山」上台後，扮晒野，青筋暴現，互相指罵，似想殺咗對方咁款。其實一切有晒劇本，大家按劇情需要演出而已。

　　談判又如何？曹廣榮一語道破：「通常冇得傾，或一方強晒，一方弱哂，咁就唔使埋枱傾啦，睬你都儍。埋枱傾，即雙方都有要求，要各為其主爭取利益，問題爭到幾多。總之談判未告終，幾大唔好露出底綫！所以，間中要扮反枱，唔傾走咗去㗎！不過，多只是虛晃一招。」

　　今次中美談判，兩國皆心照，合則兩利，問題是邊個利益多點。通常講到戲肉時，必定有所「交換」，因此談判呢場戲，只讓公眾看到為自己國家利益及面子紮馬場面，一入正題交換利益，當然唔畀得公眾知，因好多「枱底交易」也。

　　呢類談判，原則性大前提寸步不讓（例如國土完整）外，其實好多野可以出賣，當然包括香港！

　　毋須天真，大國博弈，就是如此，緊跟劇情發展可也。

曾智華

阿碌開咪