【阿碌開咪】打歐聯變踢膠波仔

過去十年，尤其近三年，各行各業老友見親面都呻問：點解？

呻乜？問乜？正是問點解香港全方位滑落？由管治者（整個特區政府班子加行政會議成員）到所有專業領域，包括法律、傳媒、教育……總之，瓣瓣唔妥！究竟發生乜事？

昨早又有資深電台人來電呻足一小時，指出如今電台節目水準跌到「低處未算低」，非常心痛，有想撼頭埋牆的衝動。

嘩嘩，使唔使咁激啊？小弟並非先知，但預測到今天的「慘況」，不過，一切發生得比估計來得更快及插得更深。

打個比喻，我有幸參與的電台水平，在上世紀七十、八十、九十年代，是歐洲冠軍聯賽（歐聯）級數。本諗住香港過渡後，再跌再差，最盡去到英冠咁上下啦，再不堪，港超好未呀？點知……原來個別範圍及節目，可以去到屋邨踢膠波仔水平！

不可怪任何一個人，因為正如鄧小平所言：「大氣候影響小氣候，一切不以個人意志為轉移！」

甚麼是大氣候？就是一個綜合多方因素而形成的客觀形勢，並非由一個人設計，而是有很多方面碰碰撞撞，加上歷史、文化、外交、戰略、人物……而形成的。

香港的電台業，雖面對上世紀七十年代TVB雄霸廣播圈，但港台及商台綜合影響力，仍足以與其抗衡，點解？

百分百因政治大氣候！因英國知道要撤退，巧妙地安排一切大鳴大放（政治與新聞傳媒）。今天不談動機，只談化學作用。大形勢瘋狂有利傳媒，於是人才、錢財滾滾湧入。創作尺度無疆無界，所有創意得到全面爆發機會。電台明星、黃金節目，當然不停爆出，誕生出一個大盛世！小弟欣逢其會，與大棚戰友，愈「打」愈興奮，自不然踢出電台界的「歐聯水平」。

如今？一齊反轉玩！政治氣氛繃緊，傳媒尺度鎖死。陰乾大格局下，當然要人冇人，要錢冇錢，就此形勢，只容「踢膠波仔」！

形勢不以個人意志轉移，唔喜歡睇或做，夾開食可也，鬧多傷身呀！

曾智華

阿碌開咪