【阿碌開咪】CV勁≠教書叻

上周三本報教育版頭條報道：疫情衝擊交流生大減，八大逾二千人退學，人數創十七年新高！

內文指出，二○一九/二○二○學年共有二千一百名八大學生退學，當中一千零四名屬學士生。

睇到報道，小弟也頗擔心。不久前聽一位兼職教授（退休後到大學教碩士課程）老友肥L呻，今年開唔成班，因只得小貓三兩隻註冊，唯有冚旗，冇癮。事實老友在業內經驗非常勁，張履歷表相當亮麗也。

上周與肥L所屬大學院長H教授晚飯，當然問問究竟如今大學生是否「雞飛狗走」？

「碌Sir，你的數字是二○一九年的。前年各大校園咁亂，內地學生當然裹足不前，唔敢嚟香港啦。係，當時退學數字好驚人！」H教授也是為食一族，見到豉汁蒸花錦鱔上枱，幾大先O趙兩件，再繼續：「嘩！正呀！跟你搵食永冇失拖！」

「喂喂喂，咪淨掛住食，講埋先啦！」

「其實去年走勢，已明顯好轉。不少內地學生，重新報讀各所大學！」

「點解呢？H教授，佢哋唔擔心咩？」

「事實，《國安法》一出，全部亂事已壓下來，慢慢恢復。大家都知，疫情一過，校園也會回到正常情況。近兩年有啲發展，對香港的大學收內地生，非常有利！」

真係唔講唔知，原來近兩年美國佬專針對中國，特朗普時代已明刀明槍，大部分學系唔收中國留學生，愈尖端科技愈拒絕。繼而不但美國，連英國、澳洲、加拿大等英語系國家，也或明或暗行這政策，因與中國關係不太友善也。咁內地生想尋求「開放式」及「自由式」的大學教育，去邊？最近最佳選擇，香港！「咁點解肥L呻收唔到學生呢？」

「其實學生大把。碩士生，學費貴，要求高，兼且着重教授的教學能力、表現能力（教授的講台，就是佢舞台），遠高於其資歷。冇學生註冊，一句講晒——你唔吸引也。肥L宜自己反省，看看能否改善『舞台技巧』吸引『客仔』嘞！」

曾智華

阿碌開咪