【阿碌开咪】送马谷针

三日前「嫩编M」来讯息：「碌Sir，有封读者信转寄你！」昨日收到，打开，咦，原来一位名Jackie读者（男/女？），用端正字体写出一条好「桥」，托我转向马会高层提议，帮手谷针。因为每次赛事日，投注站逼满人，若马迷个个打晒针，真系「捐」都「捐」得安心啲。

唔传畀马会高层嘞，佢哋最高嗰位系本栏读者，一定收到，放心！

Jackie非常有创意，佢指出香港马迷有几十万到上百万（大家单睇合法投注额每个赛日十几亿元，已知几犀利），相信九成九想一试做马主滋味，但现实中，九成九马迷根本只可发春秋大梦，一世都冇机会！因为又要做会员，又要抽中，再要花百万元计买马费，另每个月七万、八万元养只马，完全系富豪级玩意。

不过，「发白日梦」马迷养唔起啫，马会或其他富豪马主，绝对九牛一毛矣。所以，Jackie建议，为谷针，马会可以高调捐出一匹马，畀八月底前打完针者抽。马会提供「全餐」，即马价、养马费，以及一个终身会籍。呢匹马赢到所有奖金，「马主」袋一半，一半捐作慈善用途。大家话，系咪好鬼吸引？马会所费无几，但协助谷针，政治正确，也可带来轰动宣传效果，有得谂！相信此消息一出，万计老中青马迷即涌去打针，聂德权局长掂晒矣。

过去几日，天天睇英国马，最快乐为欣赏一班高水准骑师大拼搏。

呢啲场合，好睇唔好赌，因大家对马匹实力蒙查查。小弟又点？场场买五元复式二重彩，选五只同程往绩最佳者穿匀，唔睇赔率，睡前投注，翌朝睇重播当直播。

结果，第一日就撞中一条派六千七百九十三元二重彩，「安蹄逸」搭「疑情」，五蚊派三千几蚊，够玩几日！

好嘞，明天「精英杯」国际三级赛跑千四米，我会照办煮碗，选四只此程未输过扑二重彩、Q及PQ，即「高大威猛」、「达心星」、「显心星」及「表之未来」，睇睇有冇大茶饭食嘞！

曾智华

阿碌开咪