Kelly Online:薯片叔叔踩入創科界 新公司數碼港開幕

「薯片叔叔」曾俊華離開政府後，開始向科技界發展，佢真金白銀投資兼出任主席的創科公司Benefit Vantage Limited(BVL)，宣布位於數碼港的總部正式開幕，旗下手機認證解決方案IPification已成為GSMA旗下行動互聯(Mobile Connect)的合規供應商，而IPification預計年底前推出市場。
IPification可以簡化現時的網絡認證程序，用手機SIM卡的IP做認證，經電訊商確認身分就登入到唔同帳戶，咩資料都唔使輸入，即使忘記密碼都唔使驚﹗
集團另一個產品——服務平台應用程式Thousand Hands(千手)下個月將登錄香港，平台連接服務提供方同用戶，初時包括清潔、教育及美容三個範疇。例如想搵人清潔吓屋企，輸入時間、地址、人工等資料，平台就會幫你配對適合的服務提供者。
作為創科公司主席，曾俊華指香港的創科環境都算吸引，如果政府重視創科發展，內部可以帶頭多使用本地科技產品。除咗科技公司，薯片叔叔仲搞緊非牟利組織薯片叔叔合作社，合作社大約一個月前成立，仲同其他機構舉辦論壇講吓教育，佢話合作社第一階段係關注教育發展。
不少政商界人士，今日都有出席「薯片叔叔」新公司開幕禮上，當中包括立法會議員謝偉俊、葉健源、鍾國斌及前商經局局長蘇錦樑等。