工廈小情侶唔怕捱　中女住貨櫃屈閣樓

講過金融公司老闆Paul、「劏房專家」吳龍飛，《有樓萬事足》亦訪問一對住喺工廈嘅小情侶Mina、Michael。Mina以另一個朵「Mean娜」喺網上男性話題專頁做編輯，Michael就係幕前工作者。雖然住工廈實屬違法，絕不鼓吹，不過一對小情侶自言以4千幾蚊租到160呎單位，都算係咁。 佢哋都道出住工廈唔方便，要行出去公共浴室沖涼，有人拍門又驚係地政署人員巡查，仲要set定暗號返屋企，畀對方知道係「自己友」。不過Mina開心指「我嘅幸福指數有8」，願意一齊捱，好Sweet。 住工廈都嫌貴？仲有住貨櫃，更加平租，月租3千5連車位，你又點睇？32歲嘅時裝店老闆娘Icy租住新界區貨櫃，有獨立廚房、廁所，貨櫃坐4個人開飯都仲有位剩，幾咁闊落。辛酸就係夏天多蛇蟲鼠蟻，Icy話：「蜘蛛有拳頭咁大，曱甴飛得好高。」最後Icy慳足幾年終於上到車，又一勵志例子。 另一位曾任小學教師嘅28歲Bianca，為創業住鋪頭閣樓，夏天冇冷氣，要去體育館沖涼，有時抹吓身直接瞓覺。佢就話做教師好易被取代，選擇創業，住閣樓慳錢。