張秀文呻冇樓心理唔平衡　坤哥慨嘆隨時消失喺娛樂圈

做藝人似乎搵到快錢賺得多，就算香港樓價高企，應該容易過一般無父幹嘅打工仔上車掛。昨晚播出嘅《有樓萬事足》入面，張秀文、吳業坤（坤哥）呻藝人多擔憂，今日唔知聽日事，好難買樓。 以月租萬幾蚊入住兩房單位嘅張秀文，呻自己「心理唔平衡」，一直租屋，可能租足30年，就幫人供樓供足30年。張秀文呻：「呢世都儲唔到錢去買樓，我有啲期望返內地置業。」不過金融公司老闆Paul又狠狠地拋出一句：「放棄呢個幻想啦，自己地方都撈唔掂，去第二度唔洗諗吖。」 早排榮升做老闆，開西裝店嘅坤哥，亦慨嘆舊年多咗唔鍾意自己嘅人，感言做藝人大起大落，隨時喺娛樂圈消失。有見及此，坤哥搵朋友合資做生意，希望有安穩收入。坤哥同時呻樓價高，未買到樓：「400幾萬得2、300呎，買嚟做咩？畀到阿媽住定係第時個老婆又一齊住？以為努力工作就買到樓，但係一路追，樓價又一直升。」