劏得有良心？　「劏房專家」吳龍飛豪言住細空間做人積極

香港地少人多，劏房得豆潤咁細，都要出錢住㗎啦。《有樓萬事足》訪問「劏房專家」、36歲嘅吳龍飛，佢劏房劏得出神入化，仲自言劏得有良心，裝修得靚靚租出去。 去到其中一間有開放式廚房、獨立浴室嘅百幾呎劏房，飛哥以經紀嘅口吻力sell：「你睇吓間房，大到離譜，空間感幾好！住咁細嘅空間做人就會積極，儲錢買更大嘅屋，真㗎！」飛哥仲好爆咁講年輕情侶同居想「曳曳」，四千零蚊租間房就搞得掂。 捱過窮過嘅飛哥，曾任職保安員、地盤工，辛苦同女友儲落幾十萬，用嚟買樓同結婚。點樣買完樓有得自住又可以租出去？劏房就得啦。飛哥話：「劏幾間，一間自己住，其他租出去有人幫你供樓，仲賺到錢。」