李璨琛老婆訓練Lucy照顧小朋友 為追多個女提前實習

李璨琛（Sam）的老婆梁志瑩（Lucy媽）似乎打算再追多個小朋友，為3歲的囡囡李元元（Lucy）添個妹妹，她日前在社交網表示：「李老母深信吸引力法則嘅道理，所以喺LU未有妹妹之前，先要LU做咗姐姐先，為咗加緊處理，仲特登借咗人哋個女實習一下。好彩都係幫手餵下奶唔係餵糊仔（即刻諗起深喉唾液樣本事件）換吓片片，抹吓嘴嘴，全程都係作作狀狀咁啦」，見到Lucy照顧比自己年紀細的小朋友，都幾有姐姐風範，餵奶時自己無偷食，還幫手扶住個奶樽，換片時雖然打孖上，但最後都叫做有幫手着好紙尿褲。看來Lucy媽可以和老公Sam加緊努力，生多個女陪Lucy。

而昨日（6日）另一帖文，表演慾旺盛的Lucy，一如以往穿上底衫襯睡褲，對着家中的巨型鏡牆手舞足蹈，一時轉圈一時趷籮，又定格擺pose，投入度直逼準備出道的練習生。Lucy媽留言：「流住兩行鼻涕都無減佢對跳舞嘅熱誠 #真心欣賞佢個endingpose同ending樣。」