媽媽患分離焦慮症 Lucy放學後首要醫肚同shopping

李璨琛的3歲女兒Lucy李元元，9月1日正式返學，好叻豬，不單只冇喊，仲好興奮擺晒pose畀心心影相。相反，Lucy媽係最唔捨嗰位，話好想同個女玩多陣，5歲先返學最好。

前日（2日）Lucy媽post出Lucy瞓覺嘅相，並且分享阿女返學情況，最重要係繼續講出自己有幾唔捨得個女，唔捨得到想去學校做校工。Lucy媽寫道：「第一日放學後，老母問佢返學開唔開心，佢第一句答老母：『我好肚餓啊！』講完肚餓之後，佢問老母：『咁我哋而家去邊？』老母問返佢：『咁你想去邊？』佢話：『我想去shopping。』」

Lucy性格好動貪玩，媽媽問佢返學做咗乜，佢淨係答「玩囉」，雖然有同學仔爆喊，但佢就冇。Lucy媽好慘咁話：「老母最想喊。 #早抖啦 #係呀係老母患上咗重嘅分離焦慮症 #佢可能聽日就申請去做校工」

Lucy媽掛住個女似乎冇乜人關心，網民繼續將焦點放喺Lucy身上，留言：「放學去shopping，笑死」、「返學唔喊證明佢見慣大場面」。