Lucy馬騮上身食提子 被媽媽取笑「扮晒蟹」

李璨琛3歲囡囡李元元（Lucy），深得網民喜愛，好簡單，造作得嚟又好鬼搞笑！Lucy媽將囡囡呢一方面發揮得淋漓盡致，噚日（6日）又喺社交網上載Lucy食嘢片段，Lucy媽寫道：「天天練戲身體好。#演元之路」。

單單一粒提子，Lucy都可以食到古靈精怪、七情上面，重點係兩母女都樂在其中，網民先至容易被感染跟住笑埋一份。不過，Lucy日後大個女，睇返自己食嘢食到一時乸埋口面，一時滿足甜到漏；有啲時候就邊食邊扮李小龍，有啲時候睇落仲以為扮緊馬騮、猩猩定係狒狒，唔知佢會好嬲定好笑呢？片中Lucy媽話囡囡「扮晒蟹」，有網民好奇問Lucy媽點同個女解釋？Lucy笑住咁認真地回覆：「pretend to be a walking crab 咁樣囉。」