張繼聰叫「俾條生路行吓」　蔡卓妍操刀幫關智斌影靚仔相

年尾踏入4字頭的關智斌 （Kenny）近日好多搞作，除了推出《尋蝶戀花》寫真集外，月初新歌《乾爹》MV亦都終於曝光，操到勁Fit的他梗要喺新作晒吓肌肉啦！Kenny都好大方，頻頻於社交網開心Share爆肌相，昨日他又於IG貼出新照「餵」粉絲，並寫道：「乾爹終於捨得剃鬚。」雖然今次就着番件衫仔，就咁挨喺牆度擺吓Pose、Chok吓樣咁，但單靠「青靚白淨Look」已成功引來大批網友讚型仔，連周柏豪、張繼聰都忍唔住留言：「好靚仔，點解唔俾條路我哋行吓？」

然而好友蔡卓妍（阿Sa）都有留言：「啲相咁熟面口嘅？係咪一個靚女幫你影㗎？？」明顯輯相係阿Sa自己操刀，諗住對方會落番Credit啦，點知Kenny勁唔識做覆她：「靚女到你唔信 #人間尤物」結果轉個頭阿Sa自己喺IG出Po，並上載3張她為Kenny拍攝的花絮相，阿Sa寫道：「上聯：幫關斌影相 下聯：點影都靚」Kenny睇見即刻樣衰衰補飛：「Hahahaha,唔記得介紹返個攝影師添 #正菜妍 btw, 下聯係：一定唔會leung（指老土）」但有網友就批評他句對聯唔夠押韻。