阿碌開咪｜「0+7」政策係失血政策？

睇走勢，好快「0+7」會實行，再鬆多一步。效果會點，尚待觀察，因「3+4」後，來港遊客未見增長。

將心比己，全世界咁多美麗城市已通晒關，唔使打針唔使撩鼻唔使戴口罩唔使隔離唔使乜碼物碼，你係遊客，你會否願搞到成身汗來香港旅遊？

答案當然係——No！所以，「3+4」對旅遊業，根本冇幫助。唯一，係必須來港工作、經商，又或急需回港探望家人者，無奈接受。

　好嘞，「0+7」又如何？小弟問多位旅遊業內人士點睇。一致指出：「慘！香港勢必大出血，兼且流血不止！」

何來此話？正因香港人，尤其中上收入者，已滯在香港三年，冇得郁。嘩！若一旦回港唔使坐「防疫監」，仲唔飛身作報復性旅遊？一個係咁，一百個係咁，一千個係咁……一萬到十萬個都會係咁。

呢班報復性向外的旅遊大軍，你話嘞，會使走幾多香港錢？必定天文數字，深不可測！

事實，我身邊已有N個老友卜定半年機票，將三年的旅遊費一次過環遊世界，由日韓泰國開始，再到歐洲澳洲，然後美加！

咁呢個「0+7」政策，咪變失血政策？

找二○○三年揸Fit專搞Inbound旅遊的業界高人問：「老哥，可以點搞返旺香港呢？你最富經驗噃！」

「碌Sir，呢單野，並非旅遊界問題，是整個香港問題！當年沙士之後，不少城市為搶遊客，一通關，立即津貼航空公司推出廉價機票，津貼酒店大減價，與所有主題樂園議定遊客入場大折扣。總之，遊客就是財神，一定要用盡方法吸佢哋來消費，以谷起個勢。所以，一定要由政府最高層統籌及出手。若果全面開關在望，今日就要立即開始做野！尤其航空公司都停擺咁耐，冇三兩個月，根本難以起動！」

其實跑馬也是香港吸引遊客的重點，尤其快活谷！今晚全捧沈廄：「包裝風雲」、「想見你」、「人和家盛」及「日輝煌」！

曾智華

阿碌開咪

 

編按原題為「遊客就是財神」