阿碌開咪｜做馬會，斷六親

任何成功，都要付出代價，俗語講——喊都無謂。所有圈子，都是一個三角形，沉底者最多，亦最易做，Hea Hea下就掂，反正你決心做爛泥，冇乜人會對你再有要求。　

倒轉又如何？三角形的頂端很小，愈想登頂，愈是困難，自然需有過人武功、毅力及耐力，兼且必定紀律嚴明。　

只有符碌的人才以為成功有符碌。其實各行各業成功者根本心照，絕不應也不會呻。

過去三年，香港最成功的一個圈子（唔使之一嘞），公認為馬圈。在社會運動激盪，疫情嚴峻肆虐的日子，全世界都唔得，只有香港得，正是馬照跑。

跑馬，安定百萬計人情緒，提供十萬計就業機會，二百多億元計稅款，也有六十多億元善款，若果驟然停低，必產生嚴重連鎖性後果。局外人，有丁點分析能力及智慧者，必定理解。

當各行各業或停頓，或減薪，或員工WFH，或靠政府津貼……時，香港馬會竟能做到馬照跑。當然，要立下極多嚴苛規則，員工必須百分百遵守。有身受者形容：「斷六親，失自由，與坐監沒分別。但為咗一個更大目標——馬照跑，願不願也得認真遵守。否則，輕則罰款（一出手就幾十萬元），重則釘牌炒魷，損失慘重。」

事實，大家見到，個別外籍騎練頂唔順，私下表示有多少抑鬱感，也有決定暫時（或永久）回老家，「躺平面對疫情」去也。

馬會管理層立下死令，是應該的。結果是冇人越雷池半步，從未露出任何缺口，畀針對賽馬事業的Haters（呢個世界，乜人都有）出招向政府施壓。這方面，真是要多謝馬會同人的犧牲。

昨晚想約一位身處前綫的馬會高層九月晚飯，佢一聽即婉拒：「碌Sir，馬會有嚴謹的申報及追蹤機制，萬一中招或列為緊密接觸者，必須申報。最基本處理WFH！作為部門阿頭，四出晚飯中招而影響Racing Continue，『死罪』也，拜託，出年再約！」　

曾智華

阿碌開咪