阿碌開咪｜搞錯「明天必定更好」

內房股最近一年，似江河崩瀉，一發不可收拾。N年前內地各省各城見到的爛尾樓，又再舉國皆是。這個爛攤子，且看誰有本事收拾了。

昨晚與一位對內地地產發展商心態瞭如指掌的叔父級人馬碰杯，講到目前紛紛爆出的慘況。

「阿碌，呢一浪，根本遲早就要來，正是出得嚟行，預咗要還！內地發展商由上世紀九十年代開始，根本不知失敗為何物，只知明天必定更好！既然如此，唔借大借盡去博就變蠢豬矣！」

叔父指出，香港幾大地產集團的靈魂人物，過去六十年見慣見盡風浪，知道正常經濟及市道，必定起起落落。故此，永遠不會借到大晒，同時任何時間都有足夠儲備，迎接突然出現的逆境，這種心態及部署，正因來自歷史教訓。

內地發展商不同，多有梟雄心態，一有虛位，必定去盡，因怕花無百日紅。碰啱上世紀九十年代鄧小平南巡後，強調「不理白貓黑貓，捉到老鼠就是好貓」！有了這個「金剛保護罩」，當然拼盡去做，官商無不如是。

發展地皮的，做官批地的，銀行借貸的，三位一體，形成一條「黃金搵食鏈」。發展商行賄貪官，大批地皮。有了地皮，轉身行賄銀行頂層，低息貸款。資金一到位，立即狂起樓賣。資金回籠，再掃地皮。貪官袋下億元計金錢後，當然會搞多少「形象工程」，令城市發展好好睇睇，再而上繳可觀數目給中央。

這種運作已多年。不過，正是欲無窮。起初大家都懂得適可而止，不過，隨着日子過去，慣咗巨錢滾滾來，鋪鋪顯示明天必定更好，中國嘭嘭聲起飛，邊仲有得衰？

世情總是如此，當你以為事事「老奉」，失去警覺性，又愈搞愈離譜時，就會突然間「一雷天下響」，疫情加中央政策一齊夾，你班友吹到泡沫咁大，唔爆煲幾稀矣。

叔父低頭指出：「其實近年落嚟香港搞地產的內地發展商，全都抱有同一心態。故此，近三年紛紛出事，絕非意外，根本全部屬預期中！」

曾智華

阿碌開咪