青談｜育兒要幾球？

養兒一百歲，長憂九十九，係好多上一代父母的寫照，即使你活到一把年紀，爸媽仍會視你如細路不斷噓寒問暖。養兒防老早已不合時宜，隨着人口老化，香港人壽命特長，養兒同時已須兼顧防自己老，典型一闊三大。

儘管城中有非常孝順子女的父母，長期低息環境驅使，轉儲磚頭者眾，買定嚟守，待子女長大後不用再為發展商打工，甚至預先為子女儲定一筆置業基金，出發點並非睇死一隻二隻化骨龍呢世都買唔起樓，而係唔想佢哋為咗層樓犧牲，被逼放棄追夢，甚至連結婚生B都要拖到最後變了高齡產夫產婦，心態亦不難理解。

二○○六年，香港滑浪風帆選手、奧運金牌得主李麗珊與恒生銀行合作拍攝的理財主題廣告，帶出「原來養大一個BB要成四百萬元」的訊息，嘩！大嗱嗱四球養大一隻B，已嚇得城中不少父母譁然。十六年過去，香港依然百物騰貴，樓價更貴絕全球，根據同一銀行於今年六月以網上問卷調查六百三十三名三十至六十四歲、持有一百萬元或以上流動資產的香港市民，關於育兒及退休規劃的理財意見調查，結果顯示，今時今日養育一個小朋友，已需加碼至六百萬元，累計升幅剛好達五成，即平均每月要花掉二萬三千六百元，直至假設子女二十二歲經濟獨立。

有網民如獲至寶，話六百萬元買樓都未夠，亦有人指如果要儲夠錢才生B，怕且到時只能生得出痔瘡了。

正所謂數係死嘅，人係生嘅。父母對子女的愛豈可單純以金錢衡量，個人反而擔心養得大卻教而不善，淪為有錢冇品的敗類，才是對社會最大的傷害。現實是，教比養更難。有人話錢唔係問題，問題係冇錢，豐儉由人量力而為是基本。既然視養兒育女為人生必經階段，與其拘泥於一個籠統的數字，何不先做好自己及早規劃，謹慎理財，聚沙成塔，相信亦是這項調查帶給我們為人父母者的最大啟發，因為一切的機會只會留給有準備的人，要成為長勝將軍，投資更絕不能心存僥倖。

 

胡孟青

青談