阿碌開咪｜任偷睇，任收集

幾年前，一位專查科技罪案的探員老友拉我講：「碌Sir，唔畀得人知的訊息，一定不可放上手機！因如此等於入咗個任人睇的公海，絕對再冇秘密可言！快話畀你啲老友知啦！」

一直放在心。直至近年在串流平台睇謀殺實錄片集，更一清二楚，點解探員拉人要立即扣起其手機，無他，綫索「任縱橫」，要乜有乜也。

上周中央網信辦公布滴滴審查風波落幕，重重重重罰八十億幾人仔，舉國（世？）震驚。嘩，原來中國都可以對一個商業集團出手如此之重！

未講案情，先講此案的「中國特色」。

乜叫「中國特色」？即是通常犯人上庭時，不但不會否認控罪、反駁自辯或揚言上訴，反之，「認罪態度」之合作，個個似「訓練有素」的「完美被告」。

例如今次的滴滴，對法庭判決之合作與順服，堪稱典範——誠懇接受、堅決服從、嚴格按照處罰和相關法律法規要求，全面深入調查，積極配合監管，認真完成整改，並將引以為戒，堅持網絡安全與發展並重，加重個人訊息保護，切實履行社會責任！

如此反應，套用香港江湖術語，不但「全面跪低」，更是「全面趴低」！

滴滴搞成咁，乃因早前「串親掌權者」，去年六月無視內地監管機構反對，堅持到美國上市。呢吓，擺明「大」阿爺！下場就是將你封冚式作網絡安全審查，抽出所有罪證。

結果？當然高官大過商，替你「剝光豬」後，將罪證一一公布，內容非常驚人——偷睇偷聽非法截圖……罪行由千萬到幾十億條，將你打得死到貼地，擺明做次「示範表演」畀唔尊重中央、以為自己好大好巴閉的大款商業巨頭睇。

終於，一家如此前科公司，理所當然要由美國退市。當恢復正常營運後，必須尋求「資金再生」。點搞？應該極快會啟動在港上市申請。向中央面面贖罪過後，應該順順利利，冇人會鈎佢腳㗎嘞。

問題在，滴滴在港上市，有幾多人會湧去申請呢？

曾智華

阿碌開咪