阿碌開咪｜動態抄牌神出鬼沒

又中又中又中！中乜？中正「牛肉乾」是也！

相信全城車主及司機皆有我的經驗——嘩嘩嘩，搶錢咩，使唔使抄得咁狼吓喂？

我最新一張中，乃是在紅磡高山劇場旁靜靜的山西街，時間早上八點四十分。

小弟習慣，每朝七點至八點半茶記歎早餐，八點半到公園晨運。昔日到何文田巴富街球場，因疫情唔開（認真荒謬，大大個球場通風又清爽，監粗關閉，搞到本來的晨運客阿叔阿伯阿公阿婆冇得運動，一係被逼宅在家，一係行出馬路吸塵，都唔知政府有乜邏輯及需要咁做？），改去高山公園。

過去四個月，早早把車泊在隱蔽的山西街路旁，行半小時，九點走人，從未有事。

終於前朝中！冇乜好怨，「犯法就是犯法」，抵抄。不過，呢個抵抄又引起我的好奇，其實抄牌的警員，上司係幾時叫佢哋「做野」的呢？

有此一問，因不時早上八點半左右，警車又或有行咇警員經過，對違泊視而不見喎。

咁係咪一般九點先「開工」呢？唔知，只覺佢哋抄牌政策非常「動態」，難以觸摸。

昨朝到土瓜灣街市買蛋，九點，車放蛋鋪旁邊，速速跳下買（全街冇表位），因剛食完「牛肉乾」，未消化，當然非常警覺啦。一邊畀錢，一邊左望右望，以便一見藍色或啡色制服人士閃出（真㗎，佢哋不少如今真係一閃而出，手機一拍即出告票，完全唔使落筆），即刻跳返上車走人，三百二十元好貴啫。

蛋鋪老闆娘見我咁驚青，笑笑口：「哥仔，唔使擔心喎，呢處朝朝抄，不過唔係九點。呢呢，九點半啦，衝鋒車就會hur hur聲到，成隊人馬一二三全條街抄抄抄。未夠鐘，放心！」

今次真係信佢一成，雙目失明！因我未畀完錢，已見紅藍燈在街尾閃呀閃，即係點？即係今日阿Sir提早開工，等你以為我慣性九點半到？我就玩一朝神出鬼沒你歎！

冇法，又疫情津貼又消費券，政府邊度搵錢？合理嘅，我畀我畀！

曾智華

阿碌開咪