阿碌開咪｜快畀長者入馬場

時光飛逝，快過超音速核彈。一轉眼，我已攞咗長者卡幾年，身邊老友也全變「耆英」。故此，對老人家的心態，有一定掌握。這個年輕一輩未必亦唔需要理解，反正他朝君「腦」也相同！

香港大學研發的「防止自殺早期預警系統」分析，本港自殺案由二月二十二日開始攀升，至三月二十三日已達兩年高峰。期內的「七天自殺估值」顯示每日有四人自殺！而六十五歲以上長者自殺個案為各年齡層之冠，較去年同期爆升一倍！就此，防止自殺研究中心總監葉兆輝建議政府速速重啟康文設施，讓長者使用，令精神有所寄託，每日有意義地消磨時間，爭取優質生活，紓緩負面情緒升溫。

其實使乜做調查吖，睇吓自己及老友家中的長者，個個明白。若果——又冇得飲茶，又冇得見Soon仔，又冇得晨運同老友呻幾句，日子點過？躲在家？一來與家人摩擦增多，二來冇得運動健康變差，三來電視新聞猛播每日死幾多人。思前想後，怎能釋懷？當然累積抑鬱情緒。個別極端的，就走上自殺一途。故此，「防止自殺早期預警系統」的報告，是對政府的一項警告，必須面對，切勿視而不見。

講到消磨時間，因小弟是馬迷，最清楚香港有幾十萬上年紀者，每星期的最重要娛樂（甚至人生寄託），正是賽馬。未有疫情前，每個賽事日皆有幾萬長者馬迷高高興興湧入場，迷頭迷腦度馬，然後每場就興奮大嗌，將平日悶氣一掃而清。

如今冇得入場，我親眼見到幾位叔伯馬迷健康火速轉差，終日提不起勁過活似的，真真令人擔心。期望馬場急急開返，有救急扶危防止自殺效果㗎（咪以為我誇張）。

明天我主攻研究二級賽「短途錦標」，千二米。

高班平磅賽，除非有「唔識輸」的馬王（例如「精英大師」）在陣，否則會輪流搵食！

呢場「蔡氏宗親」控制大局，買「旺蝦王」可也！七歲仍不退役，應有一W在手，呢場去馬！

曾智華

阿碌開咪