阿碌開咪｜準特首必須交功課

五年前這時候，已全城開始投入「特首之戰」，集中睇「胡官」胡國興、「薯片叔叔」曾俊華及林鄭月娥泥漿摔角。最精采一段，大家仍在社交平台上瘋傳，正是胡官及薯片夾攻林鄭，並預言林鄭當選，未來五年香港將會點。

當日大家得個聽字。點知……小弟不時同老友講笑：「胡國興及曾俊華兩位，應該承諾離世後將腦袋捐出解剖，用作『先知科學電波』研究，以惠及後世！」點解咁講？你係香港人，又睇過條片的話，一定會含住成公升苦水會心微笑也，太神奇精準了。

講返今年，疫情關係，全城焦點仍在與病毒作戰。對特首選舉，無可無不可（因冇得投票）。不過，茶餘飯後八卦話題，仍會牙骹戰一番。

大家當然好奇，邊個會參選？邊個會當選？以及中央對下任特首的要求。

好啦好啦，第三項終於開估嘞。上周主管港澳事務的副總理韓正，在會見港區政協時，清楚列出對下任特首的期望（暗指今屆特首「同志仍未成功」？ ）。包括：一、能夠配合國家發展策略；二、解決住房問題；三、維護國際金融中心地位。

大家必須留意，韓正沒有強調國家安全。簡單，這方面，隨着港區《國安法》落實，中央肯定百分百放心，毋須再提升層次了。

第一點，必須了解國家發展大格局。對外對內，香港可以如何配合？這方面，緊跟「一國」的道路已掂，毋須過分特別設計。

第二點，解決房屋問題。說難不難，由零開始，香港不是沒地，以往只是法例關卡重重及利益集團猛鈎腳，令政府難越雷池半步。日後通過改變法例，自然可以拆牆鬆綁。例如加速舊區重建，村屋放寬高度……加上發展大西北。土地問題，必能解決。

第三點顯示，下任特首需要具備國際金融認識、視野及聯繫。這點，似乎特別有利陳德霖及李小加一類專才。武官能力只做到政務司司長水平而已。

有志競爭者，要快快準備交出功課喇！

曾智華

阿碌開咪